Ўзбекистоннинг Россиядаги элчиси Ботиржон Асадов 26 февраль, жума куни Евросиё иқтисодий комиссияси ҳайъати раиси Михаил Мясникович билан учрашди, деб хабар бермоқда «Дунё» АА.
Учрашувда Евросиё иқтисодий иттифоқи (ЕОИИ) билан ҳамкорлик бўйича элчихонанинг янги тайинланган маслаҳатчиси ва бир вақтнинг ўзида Ўзбекистоннинг Евросиё иқтисодий комиссиясидаги вакили бўлган Шуҳрат Шукуров таништирилди.
Шуҳрат Шукуров Евросиё иқтисодий комиссияси ҳайъати раисига ушбу комиссияга Ўзбекистон вакили тайинланиши тўғрисида бош вазир Абдулла Ариповнинг мактубини топширган.
Маълумот учун, Шуҳрат Шукуров 49 ёшда. У Москва иқтисодий-статистика институтини ва Президент ҳузуридаги Ўзбекистон давлат ва жамият қурилиши академиясини тугатган. Давлат хизматида 27 йиллик тажрибага эга. Тайинловга қадар у Макроиқтисодий изланишлар ва прогноз институти директорининг биринчи ўринбосари лавозимида ишлаб келаётганди.
Эслатиб ўтамиз, Ўзбекистон 2020 йилнинг декабрида Евросиё иқтисодий иттифоқида расман кузатувчи-давлат мақомини олган.
Изоҳ (0)