Ўзбекистондаги маҳаллалар жиноятчилик ҳолатига қараб «қизил», «сариқ» ва «яшил» тоифага ажратилади

Ўзбекистондаги маҳаллалар, туман ва шаҳарлар у ердаги жиноятчилик ҳолатига қараб «қизил», «сариқ» ва «яшил» рангларга ажратилади. Бу ҳақда ички ишлар вазири Пўлат Бобожонов вазирлик марказий аппарати раҳбарияти ва вилоят ИИБ, идора шахсий таркиби ҳамда профилактика инспекторлари иштирокида ўтказилган йиғилишда маълум қилди, деб хабар беради «Gazeta.uz».

Маълум қилинишича, йиғилишда фуқароларнинг жамоат жойларда хавфсизлигини таъминлаш, ижтимоий хавфли жиноятлар, шу жумладан, кибермакондаги жиноятларни фош этиш бўйича ишларни такомиллаштириш масалалари муҳокама қилинган.

Ички ишлар вазирининг таъкидлашича, кўплаб раҳбарлар ички хотиржамликка берилган, маҳаллаларга бориб ишламаган, ўз вақтида муаммоларни аниқлаб, уларга ечим топмагани сабаб айрим маҳаллаларда жиноятчилик ҳолатлари кўпайган.

«Тартиб-интизом, қонунларга бўлган ҳурмат, фуқароларнинг хотиржамлиги, биринчи навбатда, маҳаллаларда тартибга солинган бўлиши керак», — дейди Пўлат Бобожонов.

ИИВ раҳбари Президент сўзларидан иқтибос келтириб, профилактика инспекторларига кераксиз ишлар ҳаддан ташқари юклангани, бу эса уларнинг асосий фаолиятини — жиноятчиликнинг олдини олишга халақит беришини таъкидлаган.

Шундан келиб чиқиб, вазир маҳаллалардаги фаолиятни янги тизим бўйича амалга ошириш вазифасини қўйган. Хусусан, маҳаллалар, туманлар ва шаҳарлар у ердаги жиноятчилик ҳолатидан келиб чиқиб уч тоифага ажратилади — «қизил», «сариқ» ва «яшил». Жиноят ўчоқлари маҳаллаларнинг ўзида қайд этилади, уларнинг пайдо бўлиш омилларини таҳлил қилиш асосида аниқ ва мақсадли ишлар олиб борилади.

Ўз навбатида, жиноятлар кўп содир бўладиган маҳаллаларга қўшимча профилактика инспекторлари бириктирилади, шу ернинг ўзида тезкор, пост-партул ва йўл-патруль хизмати ходимларини жалб этган ҳолда ички ишлар бўлинмаси шакллантирилади. Жиноятчилик ҳолати мураккаб бўлган маҳаллаларга «жиноят ўчоғини» бартараф этиш учун кучлар йўналтирилади.

Бундан ташқари, «темир», «аёллар» ва «ёшлар» дафтарлари асосида маҳаллалар кесимида аниқ маълумотлар базаси шакллантирилиб, унинг ёрдамида «муаммоли ҳар бир шахс билан индивидуал ишлар олиб борилади».

Эслатиб ўтамиз, Президент Шавкат Мирзиёев 12 февраль куни Тошкент шаҳар ИИББга ташриф буюрган эди. Ўшанда давлат раҳбари «ҳозир ҳамма телефонда, ижтимоий тармоқларда эканлиги, одамларни ички ишлар бўлимига чақирадиган ёки қоғоздаги мурожаатини кутиб ўтирадиган замон ўтгани»ни таъкидлаганди.