«Ёшлар — келажагимиз» жамғармаси собиқ бош ҳисобчиси катта миқдордаги камомадга йўл қўйгани сабаб ишдан бўшатилди. Бу ҳақда жамғарма матбуот хизмати хабар берди.
Маълум қилинишича, «Ёшлар — келажагимиз» жамғармаси собиқ бош ҳисобчиси А.У. жамоа ўртасида мунтазам равишда носоғлом муҳитнинг юзага келишига сабабчи бўлгани учун ишдан бўшатилган. Мазкур ҳолат суд жараёни орқали ҳам ўз тасдиғини топган.
Шунингдек, таъкидланишича, А.У.нинг фаолияти ўрганилганда ушбу камомад жамғарма томонидан аниқланган. Ҳолат юзасидан тўпланган ҳужжатлар прокуратура органларига тақдим этилган. Бугунги кунда бош ҳисобчидан қарийб 500 миллион сўм ундирилган ва унинг мол-мулки хатловга олинган.
«Мазкур ҳолатга бефарқ бўлмай, ижтимоий тармоқларда ўз фикр ва мулоҳазаларини билдираётган фаол фуқароларимизга шуни маълум қиламизки, ўз нафсини жиловлай олмайдиган бир нафар ходимнинг хатти-ҳаракатлари бутун ташкилотга нисбатан салбий баҳо бериш учун асос бўлмаслиги керак», — дейилади хабарда.
Тошкент вилояти прокуратурасининг маълумотларига кўра, «Ёшлар — келажагимиз» жамғармасига ажратилган маблағлар ҳисоб рақамидан Марказий аппарати собиқ бош ҳисобчиси А.У. ўзининг шахсий пластик картасига («Давр банк» Юнусобод филиалидан очилган) 2020 йил 7 февраль куни 50 миллион сўм, 2 март санасида эса 150 миллион сўм ўтказган. Шунингдек, у ўзининг таъсислигидаги оилавий корхонасининг («Халқ банки» Зангиота филиалидан очилган) ҳисоб рақамига 21 июлда ҳеч қандай ҳужжатларсиз 991 миллион сўмдан ортиқ пулни ўтказиб, жами 1 миллиард 191,3 миллион сўм пулни ўзлаштириш йўли билан талон-торож қилган.
Маълумот учун, Ўзбекистонда «Ёшлар — келажагимиз» жамғармаси ва унинг шаҳар-туман филиаллари Ўзбекистон Президентининг 2018 йил июндаги «Ёшлар — келажагимиз» давлат дастури тўғрисидаги фармони билан ташкил этилган.
Изоҳ (0)