Халқ таълими вазирлиги ижтимоий тармоқларда Қашқадарёдаги мактабларнинг бирида ўқитувчининг ўқувчини бувиси томонидан ҳақоратлангани тасвирланган видеога муносабат билдирди.
Халқ таълими вазирининг Назорат-ҳуқуқий хизмати томонидан аниқланишича, ҳодиса 15 февраль куни Китоб тумани Халқ таълим бўлимига қарашли 85-умумтаълим мактабида юз берган.
«Маълум бўлишича, мактабда фан амалиёти ўтаб, 5-синфда дарс машғулотлари олиб бораётган Қарши давлат университетининг тарих факультети 4-курс талабаси Бобоназар Хуррамов ўқувчининг тартибсизликка йўл қўйгани, уй вазифасини бажармагани боис танбеҳ берган.
Ўқитувчининг шаъни ва қадр-қимматига путур етказганлиги учун ўқувчининг бувисига нисбатан Маъмурий жавобгарлик тўғрисидаги кодекснинг 197 (5)-моддасига асосан маъмурий иш қўзғатиш тўғрисида ариза киритилаётганини маълум қиламиз», — дейилади вазирлик хабарида.
Вазирлик ота-оналарни улар томондан ўқитувчиларга қилинаётган ҳар қандай ножоиз муносабат боланинг онгига салбий таъсир қилиб, унда ўқитувчи ва мактабга нисбатан ҳурматсизлик ҳиссини янада авж олдиришини эслатиб ўтган.
« ‘Талим тўғрисида’ги қонунга биноан Ўзбекистонда таълимнинг устуворлиги таъминланган. Сизга бу борада ҳуқуқий маслаҳат зарур бўлган тақдирда «Устоз овози» виртуал инспекторига ёҳуд ҳудудингиздаги вазирнинг Назорат-ҳуқуқий хизматига мурожаат қилишингиз мумкин. Шаънингиз ва қадр-қимматингиз поймол бўлишига йўл қўйманг», — дейилади ХТВ хабарида.
Маълумот учун, «Таълим тўғрисида»ги қонунинг 45-моддасига асосан ўқитувчининг ҳуқуқлари, шаъни, қадр-қиммати ва ишчанлик обрўси давлат ҳимоясида. Маъмурий жавобгарлик тўғрисидаги кодексининг 197 (5)-моддасига кўра, ҳеч ким ўқитувчининг хизмат вазифаларини бажаришига тўсқинлик қилишга ҳақли эмас.
Аввалроқ Самарқандда дарс пайтида оёғини парта устига қўйиб ўтирган мактаб ўқувчиларининг ота-оналари жаримага тортилгани, Жиззахдаги мактабларнинг бирида вояга етмаган ўқувчи ҳомиладор эканлиги ҳамда Бухорода ўғриликка қўл урган мактаб ўқувчисига суд ҳукми ўқилгани ҳақида хабар берилганди.
Изоҳ (0)