Президент Шавкат Мирзиёев раислигида 19 февраль куни ўтказилаётган Халқ депутатлари Наманган вилояти кенгашининг навбатдан ташқари 26-сессиясида давлат раҳбари вилоят ИИБ ёшлар етакчисини янги лавозимга тайинлаш бўйича таклиф билдирди, дея хабар берди «Дарё» мухбири.
Йиғилишда сўзга чиққан вилоят ички ишлар бошқармаси ёшлар етакчиси, 31 ёшли Достон Абдуқаҳҳоровни давлат раҳбари саволга тутиб, унинг «маҳаллабай» ишлаш тизими бўйича фикрларига қизиқди.
Шундан сўнг Президент Достон Абдуқаҳҳоровни Наманган шаҳар ҳокимининг биринчи ўринбосари лавозимига тайинлаш бўйича таклиф киритди. Президент унга Наманганнинг янги тажрибаси бўйича ҳаракат қилишини, фидойи бўлиши ва «маҳаллабай» тизими бўйича ишлашни жадал олиб боришини таъкидлаб, топшириқлар берди.
Достон Абдуқаҳҳоров президентнинг ишончини оқлашини айтиб, мазкур вазифаларни бажаришда бор куч-ғайратини аямаслигини билдирди.
Аввалроқ Ўзбекистон Ички ишлар вазирлиги тизимида бир қанча лавозим тайинловлари рўй бергани ҳамда Шавкат Мирзиёев Тошкент шаҳар ички ишлар бош бошқармасига ташриф буюргани ҳақида хабар берилганди. Шунингдек, Ички ишлар вазирининг ўринбосари Президент маслаҳатчисига ўринбосар этиб тайинланди. Ички ишлар тизимида ишлаган Шуҳрат Мўминов Фарғона туманига, Сайидбаҳром Сайидмусаев Сўх туманига ҳокими этиб тайинланганди.
Изоҳ (0)