Айни пайтда Президент Шавкат Мирзиёев раислигида ўтказилаётган Халқ депутатлари Наманган вилояти кенгашининг навбатдан ташқари 26-сессиясида давлат раҳбари Шавкат Абдураззоқовни вилоят ҳокими лавозимига тавсия қилди, дея хабар бермоқда «Дарё» мухбири.
Тавсия этилган номзод вилоят кенгаши депутатлари томонидан бир овоздан қўллаб-қувватланди.
Президент Наманган вилояти ҳокими лавозимига номзоди тасдиқланган Шавкат Абдураззоқов ҳақида фикр билдираркан, хусусан, шундай деди: «Наманганни тушунадиган, узоқ-узоқ ҳудудлардаги аҳвол қандай эканлигини биладиган одамни қўйишимиз керак. Биласизми, ҳар битта вилоятда шундай раҳбарни 5 йил олдиндан тайёрлашни бошлашга мажбур бўлганман. Абдураззоқов Наманган тумани ва шаҳрида ҳоким бўлиб ишлаган, уни Тошкентга олиб кетганман, кўз олдимда тажриба орттирди. Бош вазир бўлганимда, ёнимда олиб юрардим, синовдан ўтган. Вилоят ҳокими лавозимга Абдураззоқовдан бошқа муносиб номзод йўқ».
Маълумот учун, Шавкат Абдураззоқов Шокиржонович 1976 йилда Наманган шаҳрида туғилган. 1998 йилда Наманган саноат-технология институти, 2006 йили Президент ҳузуридаги Давлат ва жамият қурилиши академиясини тамомлаган. 2001—2015 йилларда Наманган вилоятида турли лавозимларда фаолият юритган. 2015—2017 йилларда Наманган тумани ҳокими, 2017 йилда Вазирлар Маҳкамаси қишлоқ ва сув хўжалиги, қишлоқ хўжалиги маҳсулотларини қайта ишлаш ҳамда истеъмол товарлари масалалари ахборот-таҳлил департаментининг мудири, 2017—2020 йилларда Наманган шаҳри ҳокими лавозимида меҳнат қилган. 2020 йилнинг март—сентябрь ойида Экология ва атроф-муҳитни муҳофаза қилиш давлат қўмитаси раиси вазифасида ишлаган. 2020 йилнинг сентябрь ойида Наманган вилояти ҳокими вазифасини бажарувчи этиб тайинланган эди.
Изоҳ (0)