Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков мамлакатда коронавирусга қарши эмлаш тадбирлари қачон бошланиши ва кимлар биринчи галда эмланишини маълум қилди.
Унинг сўзларига кўра, эмлаш жараёнлари Ўзбекистонга вакцинанинг етиб келишига боғлиқ. Ҳозирча бу муддат февраль ойининг охири ва март ойининг бошлари деб белгиланмоқда.
Соғлиқни сақлаш вазирлигининг 15 февралдаги 31-сонли буйруғига асосан аҳоли касалликни юқтириб олиш хавфига қараб тоифаларга бўлинган. Унга мувофиқ, юқиш хавфи жуда юқори бўлганлар:
- 65 ёшдан катта бўлганлар (65—74, 75—84, 85 ёш ва ундан юқорилар);
- тиббиёт ходимлари;
- сурункали касалликлар билан диспансер назоратида турадиганлар;
- Қуролли кучлар ва ҳуқуқни муҳофаза қилиш органлари ходимлари;
- журналистлар, блогерлар, ОАВ ходимлари;
- транспорт ходимлари (метро, темир йўл, аэропорт);
- мактабгача таълим ташкилотлари ва мактабларда хизмат қилаётган ходимлар;
- чет давлатларда таҳсил олувчи талабалар;
- меҳнат мигрантлари.
Шундан:
- 65—74 ёшгача бўлган қариялар 1 085 797 нафар;
- 75 ёшдан 84 ёшгача бўлган кексалар 388 686 нафар;
- 85 ёш ва ундан юқори ёшдаги кексалар 139 280 нафар;
- тиббиёт ходимлари 447 976 нафар;
- сурункали касалликлари бор аҳоли (18−65 ёш) 888 190 нафар;
- мактаб ўқитувчилари 689 383 нафар;
- мактабгача таълим муассасаси ходимлари 223 426 нафар;
- қуролли кучлар ва ҳуқуқни муҳофаза қилувчи органлар ходимлари 180 минг нафар.
Изоҳ (0)