Ўзбекистонда «нақдлаштирувчи корхоналар» доирасида дастлабки текширилган ҳолатларнинг 94,1 фоизида сохта операциялар амалга оширилгани тасдиқланди

Давлат солиқ қўмитаси Ўзбекистонда «нақдлаштирувчи корхоналар» билан курашишни бошлагани ҳақида хабар берилган эди.

Хатарларни таҳлил қилиш натижасида аниқланган 396 та корхонадан иборат шубҳали контрагентлар реестри тузилган, шунингдек, солиқларни камроқ тўлаш мақсадида пул маблағларини нақдлаштириш билан шуғулланувчи «нақдлаштирувчи корхоналар» хизматларидан фойдаланган 10 мингга яқин ташкилотлар рўйхати шакллантирилди.

Давлат бюджетга тўланмаган қўшилган қиймат солиғи суммаси ўрнини қоплаш мақсадида ушбу 396 та «шубҳали» корхоналар ва уларнинг деярли 10 мингга яқин бизнес ҳамкорларининг шахсий кабинетларига инкассо топшириқномалари қўйилиши бўйича хабарномалар юборилган.

Spot’нинг ёзишича, куни кеча қўмита солиқ тўловчилар учун 18 февралдан бошлаб қўмитада ҳам, барча солиқ идораларида ҳам фаолият кўрсатувчи ишчи гуруҳларини тузди. «Нақдлаштирувчи корхоналар» билан молиявий операцияларни амалга оширган тадбиркорлар камерал текширув ўтказиш бўйича мурожаат қилишлари мумкин.

Қўмита натижалар тўғрисида ижтимоий тармоқлар орқали ҳар куни ҳисобот бермоқда. Хусусан, 17 февраль куни 17 та корхонада ўтказилган солиқ назорати тадбирларининг дастлабки натижаларига кўра, 16 та корхона ёки 94,1 фоиз ҳолларда сохта операцияларни амалга ошириш фактлари тасдиқланган. 18 февраль куни эса 14 та ҳолатдан 12 таси тасдиқланган.

Шу билан бирга, мурожаатларнинг аксарияти ҳали ўрганилмоқда ва унинг натижалари ҳозирча номаълум.