Ўзбекистонда 2020 йилда йўл-транспорт ҳодисалари оқибатида жами 1962 киши ҳалок бўлди. Бу ҳақда АОКАда ИИВ ЙҲХББ раҳбар ва мутасаддилари иштирокида ўтказилаётган матбуот анжумани доирасида маълум қилинди.
Таъкидланишича, ушбу кўрсаткич 2019 йилга нисбатан 6,3 фоизга кам. Яъни 2019 йилда йўл-транспорт ҳодисалари оқибатида ҳалок бўлганлар сони 2094 нафарни ташкил этган.
«Вазирлик ташаббуси билан мактаб ўқувчиларига ‘Йўл ҳаракати қоидалари‘ни ўргатиш учун ‘Ҳаракат хавфсизлиги синфхоналари’ ҳамда ‘Йўл ҳаракатини ўрганиш майдончалари’ ташкил этилди. Яна бир қулайлик: ‘Маъмурий амалиёт’ КААТ ҳамда ‘Dyhxx.uz’ сайти орқали вақтинчалик жарима майдонига жойлаштирилган транспорт воситасини масофадан туриб олиб чиқишнинг электрон тартиби жорий этилди», — дейилади хабарда.
«Gazeta.uz»нинг ёзишича, мамлакатда 2020 йилда жами ЙТҲлар сони 2019 йилга нисбатан 13,7 фоизга камайиб, 6982 тани ташкил этган. Шундан ўлим билан боғлиқ ҳолатлар сони 1689 та. ЙТҲлар оқибатида жароҳатланганлар сони эса ўтган йилга нисбатан 16,8 фоизга камайиб, 6591 нафарга тенг.
Изоҳ (0)