Кўз «учиши»ни стресс билан боғлаш аҳоли орасида оммалашган сабаблардан бири. Лекин аслида бунга бепарво бўлмаслик лозим.
Асабийлашиш ва уйқусизлик
Шифокорларнинг фикрига кўра, кўзнинг «учиши» бу — кўз мушакларидаги асаб толаларининг ҳаддан ташқари зўриқиши оқибатида юзага келадиган спазм ҳолати ҳисобланади. Кўз «учиши»нинг энг кўп учрайдиган сабаби – ҳаддан ортиқ чарчоқ ва стрессдир. Агар бундай ҳолат биринчи марта содир бўлаётган бўлса, режимга риоя қилиш, етарлича ухлаш ва стресс даражасини камайтириб, ортиқча ишламасликка ҳаракат қилиш керак. Бошқача қилиб айтганда, кўз «учиши» – бу организм намоён қилаётган белгилардан биридир. Демак, стрессдан халос бўлиш ва соғлиққа кўпроқ эътибор қаратиш вақти келди.
Меъёридан ортиқ қаҳва ичиш
Сабаблардан яна бири – кофеинни ортиқча истеъмол қилишдир. Маслаҳат эса оддий, одатдаги рационга фойдали маҳсулотлар қўшиш ва қаҳва, чой, газли ичимликлар ва шоколад миқдорини камайтириш кифоя.
Витамин етишмаслиги
D витамин ҳамда магний етишмаслиги натижасида мушаклар тўлиқ бўшашмайди, улар доимо босимда бўлади. Шунинг учун уйқуда кўпроқ томир тортишиши ёки кўзлар «учиши» мумкин.
Қалқонсимон без фаолиятининг бузилиши
Бу энг кам учрайдиган сабаб бўлиб, беморда кўз «учиши» билан биргаликда илгари ҳам қалқонсимон без фаолияти билан муаммолар юз берган бўлса, шифокорга мурожаат қилиш керак. Чунки бу гипертиреознинг аломати бўлиши мумкин. Бундай вақтда гормон даражаси ошиб, организмга токсик таъсир ўтказиши мумкин.
Изоҳ (0)