Қаҳва, ёнғоқ ва сут: пневмониядан сўнг организмни тиклашга ёрдам берадиган 8 маҳсулот

Организмда вирус ва бактериялар сабаб қўзғаладиган пневмония касаллигини енгишда қўшимча тарзда табиий йўллардан ҳам фойдаланиш керак. Тўғри овқатланиш эса бунинг синалган усулидир. Ҳеч қандай озиқ-овқат жиддий даволанишнинг ўрнини боса олмаса ҳам, лекин организм тикланишида ёрдам бериши аниқ.

Ёғли балиқ

Омега-3 ёғ кислоталари яллиғланишни камайтиришга ёрдам беради. Шунинг учун шифокорлар ҳафтасига икки-уч маротаба балиқ истеъмол қилишни тавсия этади. Аммо ўпка билан боғлиқ касалликларда тана уни чекланган миқдорда ҳазм қилиши мумкин.

Ёнғоқ

Омега-3 га бой бўлган яна бир маҳсулот. Аммо улар балиқнинг ўрнини боса олмайди. Чунки ушбу маҳсулот таркибидаги омега-3 айнан жонзотлар гўшти таркибидан фарқ қилади. Аммо иккиси ҳам соғлиқ учун фойдали ва яллиғланишни камайтиради. Шунинг учун кун давомида бир ҳовуч ёнғоқ истеъмол қилиш керак.

Цитрус мевалар

C витаминига бой бўлган цитрус мевалар иммун тизимини мустаҳкамлайди ва ўпка саратони хавфини камайтиради. Олимларнинг аниқлашича, ҳар куни қабул қилинган 100 миллиграмм C витамини ўпка саратони хавфини 7 фоизга камайтиради.

Булғор қалампири

Ушбу ёрқин рангдаги сабзавотлар ҳам C витаминига бой бўлиб, цитрус меваларга аллергияси бўлганларга яхши ўриндош бўла олади. Шунингдек, булғор қалампирининг сариқ нави организмдаги яллиғланишни камайтиришга ёрдам берадиган антиоксидантларга бой.

Сут

D витамини етишмаслиги ўпка касаллиги хавфини оширади ва шунинг учун пневмония совуқ ҳамда қуёш нури кам мамлакатларда икки баравар кўпроқ учрайди. Бир стакан сут таркибида эса инсон учун зарур бўлган кунлик дозанинг тахминан бешдан бир қисми мавжуд. Шунинг учун сут ичишни канда қилмаслик зарур, аммо унинг ёғсизлигига эътибор бериш керак.

Кўк чой

Ушбу ичимлик эркин радикалларни йўқ қилишга қодир бўлган антиоксидантларга бой эканлиги маълум. Ушбу бирикмалар касаллик вақтида анча хавфли бўлиб, улар оксидловчи стрессни келтириб чиқаради, бу эса ҳар қандай яллиғланишни кучайтиради. Шунинг учун кўпроқ лимон билан кўк чой ичиш тавсия этилади.

Қора қаҳва

Қаҳва доналари ҳам кўк чой сингари полифенолларга бой. Аммо ичимликка шакар ҳамда сут солинса, таркибидаги фойдали моддалар ўз кучини йўқотиб юборади. Шунинг учун ҳам вақти-вақти билан оддий қора қаҳва ичиш тавсия этилади.

Помидор

Астма билан касалланган беморлар бир ҳафта давомида помидор шарбатини ичиши натижасида ўпка фаолияти яхшиланиши исботланди. Тадқиқотчилар бунинг ортида ликопин деб номланган антиоксидант турганини тахмин қилди. Пневмония билан касалланганлар эса рационга помидорни имкон қадар тезроқ қўшиши мумкин.