Испанияда терроризмни улуғлаш ва қироллик оиласини ҳақорат қилишда айбдор деб топилган рэпер Пабло Асель ҳибсга олинганидан кейин ушбу воқеага қарши норозилик намойишлари ўтказилди. Бу ҳақда «Korrespondent.net» хабар берган.
Тартибсизликлар Барселона, Мадрид ва бутун Каталония бўйлаб ёйилди. Оқибатда 50 га яқин киши, хусусан, Каталонияда 29 киши, Мадридда 14 киши ҳибсга олинган, камида беш нафар полициячи жароҳат олган. Намойишлар фонида Испания пойтахти талафот кўрган. Барселона ва Леридада саккиз кишига турли даражада шикаст етган. Улар асосан енгил, бир киши эса ўрта даражада тан жароҳати олган, икки киши касалхонага ётқизилган.
Полиция жамоат тартибини бузишга уринишларни шафқатсизларча бостирган ва намойишчиларга қарши резина ўқ, дубинкалар ва кўзни ёшлатувчи газдан фойдаланган. Бунга жавобан намойишчилар ҳуқуқ-тартибот органлари ходимларига тош отган.
Бундан ташқари, ОАВ намойиш чоғида ёнғин чиққани ҳақида хабар берган.
2015 йилда Асель радикал чап қанот терроризмини улуғлагани учун икки йиллик шартли қамоқ жазосига маҳкум этилган эди, 2018 йилда у яна қамоққа ҳукм қилинди. Суд унинг Twitter’даги 64 та постида ва YouTube’даги битта композициясида терроризмни улуғлайдиган ҳамда монархия ва давлат муассасаларига қарши туҳматларни ўз ичига олган контентни юритганликда айблаган.
Рэпер тўққиз ойлик қамоқ жазосига ҳукм қилинганди, аммо суд жараёни бир неча йилга чўзилиб кетди. У 12 февраль куни қамоқхонага ўз ихтиёри билан келиши керак эди, аммо бундан бош тортди ва Лейда Университетида ўзининг 50 га яқин тарафдорлари ортига бекинди. Полиция Аселни қўлга олиш учун университетга бостириб киришга мажбур бўлди.
Аввалроқ Чилининг жанубидаги Пангипули шаҳрида маҳаллий полиция томонидан кўча артисти ўлдирилгач шаҳарда оммавий тартибсизлик бошлангани ҳақида хабар берилганди. Маҳаллий ОАВ маълумотларига кўра, 25 ёшли жонглёр ҳужжатларини кўрсатишдан бош тортган ва полициядан қочишга уринган. Навбатчи қисм хизматчиларидан бири унга қарата ўқ узган.
Изоҳ (0)