«Унинг зарбаларидан сўнг дарвозабонлар тўп қайси томонга учаётганини тушунмасди». Дунё футболи юлдузлари Алессандро дель Пьеро ҳақида

Ўтган асрнинг 90 йилларида худди ҳозиргидек икки ҳужумчи катта саҳнага чиққанди ва даврани ҳеч кимга беришни истамасди. Булар – Роналдо ва Алессандро дель Пьеро эди. Агар бразилиялик «сўйлоқ» терма жамоа ҳамда «Барселона», «Интер», «Реал» каби клубларидаги ўйинлари билан танилган бўлса, дель Пьеро деярли бутун фаолиятини «Ювентус»да ўтказган. Алессандро айнан Турин клуби ва Италия терма жамоаси сафидаги ўйинлари орқали том маънода афсонага айланади. Жаҳон Чемпионатидан тортиб то Чемпионлар Лигасигача бўлган мусобақаларда ғолиб чиққан дель Пьеро ҳақида қанча гапирса ҳам камлик қилади. Унинг ўзи ва ўйинига эса фақат дель Пьеро даражасидаги ва у билан бирга тўп сурганларгина баҳо бериши мумкин. Қуйида таниқли (собиқ) футболчиларнинг афсонавий дель Пьеро ҳақидаги иқтибослари тақдим этилади.

Ҳа, Италия чемпионати ажойиб футболчисини йўқотди. Аммо мен Сандронинг ўз танловидан мамнунлигини биламан. Барчамиз унинг қарорини ҳурмат қилишимиз керак. У шу йўлни танлади ва мен Австралиянинг (фаолиятининг сўнгида, 2012 йилда «Сидней» клубига ўтади – «Дарё») вазиятни яхши томонга ўзгартира оладиган мамлакат эканига аминман.

Кристиан Виери

Алессандро – авлодимизнинг кумири. Ва мен сизга аниқ айтаманки, у жарима зарбаларини мендан яхшироқ тепади. Бу шунчаки гап эмас. Мен яқин масофадан зарба беришни афзал кўраман, Але эса узоқдан зарба беради. Дель Пьеронинг зарбалари жуда ғалати йўналишда ҳаракатланади, аммо жуда тез. Унинг зарбаларидан кейин дарвозабонлар шунчаки тўп қайси томонга учаётганини тушунмасди.

Роналдиньо

Дель Пьеро 600 та ажойиб ўйин ўтказган. У суперпрофессионаллар даврида бутун муҳаббатини футболга берган ҳақиқий маэстродир. Мен учун Алессандро нафис футбол ва севимли жамоасига борини берган ўйинчи намунасидир.

Йохан Кройфф

Алессандро, сен мен ўхшашга ҳаракат қилган намуна эдинг. Сен чемпионсан ва доимо мени ҳайратлантиргансан.

Криштиану Роналду

Азизим Алекс, сенинг Австралияда янги саргузаштларингни бошлашингдан хабарим бор (дель Пьеро фаолиятининг сўнгида, 2012 йилда «Сидней» клубига ўтади – «Дарё»). Ҳозирда бирга босиб ўтган йўлларимиз хотирамда айланмоқда. Биз бир-биримизга қарши жуда кўп ўйин ўтказдик ва жамоаларимизнинг ҳақиқий етакчилари сифатида биз ҳар доим бир-биримизга ҳурмат-эҳтиром ҳис қилардик. Римлик сифатида баъзи учрашувларни эслашим менга азоб беради, аммо ҳеч нарса сенга бўлган муносабатни ўзгартира олмайди. Бу хайрлашувни ёзаётганимда бироз хафа бўлдим. Аммо бир нарсани биламан, сен каби чемпион ҳар доим янги чақирувларни топа олади. Сенинг турмуш тарзинг ва спортдаги ютуқларинг – дунёда италиялик спортчининг энг яхши рекламаси бўлади.

Франческо Тотти

Дель Пьеронинг буюк чемпион бўлишини тушунишим учун у билан 10 дақиқа суҳбатлашиш кифоя қилганди. Алекс – итальян халқига мансуб футболчи. У Пеле ёки Марадонадек бўлолмаслиги мумкин, аммо аминманки, Эйсебио, Омар Сивори ёки Ёхан Кройфф даражасидаги ўйинчига айланади.

Жованни Трапаттони

Болалигимда дель Пьеро кумирим бўлган. Мен ҳар доим «Ювентус»га мухлис бўлганман ва шундай бўлиб қоламан, шу боис у мен учун тарихдаги энг буюк футболчилардан биридир. Майдонда ҳам, унинг ташқарисида ҳам. Алессандронинг ўйинини тўхтовсиз томоша қилиш мумкин. Дель Пьеро –футболимизнинг ҳақиқий хазинаси.

Марко Верратти

Дель Пьеро каби ўйинчилар 150 йилда бир марта туғилади. Клубимизнинг ҳар бир кейинги «ўнинчи рақами» олдин ким бу рақамда ўйнаганини билиши ва Алекс «Ювентус»да намойиш этган даражага мос келиши керак.

Жанлуижи Буффон

Мен учун дель Пьеро жамоамизнинг энг муҳим ўйинчиси ҳисобланади. У «Ювентус»нинг ҳақиқий рамзидир, мен у билан бирга ўйнаш шарафидан жуда фахрланаман.

Давид Трезеге

Аввало, Але менинг кумирим бўлганини айтмоқчиман. Болалигимда доимо у ўйнаган жамоалар либосларини сотиб олардим. У «Ювентус», Италия ва бутун футбол оламига жуда кўп нарса берган профессионал намунасидир. Ва у Мальдини ёки Роналдодан асло қолишмайди.

Алешандре Пато

Дель Пьеро – бу буюк спортчи, Италия ва Европа тарихидаги энг зўрларидан бири. Унинг ўйинини кўриш мен учун ҳар доим ёқимли бўлган. Бизнинг у билан футбол йўлларимиз жуда ўхшаш.

Рауль

Дель Пьеро – «Ювентус» ва Италия тарихидаги энг яхши футболчилардан бири. У ўз ўйинининг гўзаллиги ва поклиги туфайли миллионлаб футбол мухлислари орасида шуҳрат қозонган.

Лионель Месси