Ўзбекистоннинг Qanot Sharq Airlines хусусий авиакомпанияси Американинг иккита Аирбус А320-200 самолётини ижарага олди

Ўзбекистоннинг Qanot Sharq Airlines хусусий авиакомпанияси Америка компаниясидан фойдаланилган иккита Аирбус А320-200 самолётини узоқ муддатли фойдаланиш учун ижарага олди. Бу ҳақда компания сайтида маълум қилинган.

Самолётларни етказиб бериш 2021 йилнинг март ойига режалаштирилган. Бу Ўзбекистон стартап авиакомпанияси паркидаги дастлабки иккита самолёт бўлади.

Қайд этилишича, у ҳудудий аэропортлардан Истанбул, Анқара (Туркия), Дубай (БАА), Жидда, Мадина (Саудия Арабистони), Москва, Санкт-Петербург (Россия) ва Олмаота (Қозоғистон) каби халқаро йўналишларга парвоз қилади.

2019 йилнинг сентябрида Qanot Sharq Airlines хусусий компанияси Супержет самолётларига шартнома (етказиб бериш ҳақидаги битимни назарда тутади) имзолагани ҳақида хабар берилган эди. Авиакомпания, шунингдек, Россиянинг Sukhoi Civil Aircraft Company (ССАC) компаниясидан учта Супержет 100 самолётини лизингга олишни режалаштирганди.

2019 йилнинг августида Qanot Sharq Airlines муассиси Носир Абдуғаффоров компания бошланишига 2-3 та самолёт олиш ва ўз флотини мунтазам равишда кенгайтиришни режалаштираётганини айтганди.

«Ўтган йил ноябрда президент фармони чиққанидан сўнг («Ўзбекистон Республикасининг фуқаро авиациясини тубдан такомиллаштириш чора-тадбирлари тўғрисида») биз авиакомпанияни ҳудудий авиаташувчи сифатида қайта жонлантиришга қарор қилдик. Биз ҳудудий техника ишлаб чиқарувчи учта етакчи — Embraer (Бразилия), Bombardier (Канада) ва Sukhoi (РФ) компаниялари билан учрашдик. Парвозлар географияси, парвоз жадвали ишлаб чиқилмоқда. Шунингдек, авиакомпаниянинг ташкилий тузилмаси тайёрланмоқда», — деган эди у.

Маълумот учун, Qanot Sharq Airlines 1998 йилда рўйхатга олинган ҳамда юк ва йўловчи авиаташувларига ихтисослашган. 2003 йилдан 2012 йилгача компания «Ўзбекистон ҳаво йўллари» МАКдан Ил-76 самолётларини ижарага олган ва Ўзбекистондаги биринчи хусусий авиакомпания ўлароқ ўз чартер рейсларини амалга оширган. Компания 150 мингдан ортиқ йўловчи ташиган. Барча Ил-76 самолётлари Ўзбекистон Мудофаа вазирлигига ўтказилгач, Qanot Sharq Airlines’нинг эксплуатантлик сертификати тўхтатилган.