Ўзбекистон Хитойнинг Zhifei Longcom Biopharmaceutical компанияси томонидан яратилган ZF 2001 вакцинасининг ҳаммуаллифи сифатида тан олингани ҳақида хабар берилган эди.

Фото: Инновацион ривожланиш вазирлиги

Хитой компанияси мазкур вакцинани ҳамкорликда ишлаб чиқариш учун Ўзбекистонда фаолият юритаётган бир қатор фармацевтика корхоналари фаолиятини ўрганиб, лаборатория ҳамда техник ва ишлаб чиқариш қувватларини инобатга олиб, Jurabek Laboratories МЧЖ қўшма корхонасини танланди. ЎзАнинг хабар беришича, бу ҳақда махсус комиссия йиғилишида маълум қилинди.

Эндиликда ушбу янги вакцина ZF-UZ-VAC 2001 номи билан ишлаб чиқарилади.

Йиғилишда, шунингдек, ушбу вакцинанинг мамлакатда учинчи босқич синовлари муваффақиятли ўтказилаётгани ва Ўзбекистон бу вакцина яратилиши ва ишлаб чиқарилишида ҳаммуаллиф давлат этиб белгиланганини инобатга олиб, ZF-UZ-VAK 2001 вакцинасидан фавқулодда вазиятларда фойдаланишга рухсат бериш масаласи ҳам муҳокама қилинган.

Агар махсус комиссия бунга рухсат берса, Хитой вакцинаси ҳамкор сифатида Ўзбекистонга имтиёзли нархларда ва етарли қувватларда етказиб берилади. Бу ҳақда Республика махсус комиссиясининг навбатдаги йиғилишида иштирок этган Олий Мажлис Қонунчилик палатаси депутати Дониёр Ғаниев маълум қилганди.

Унинг айтишича, махсус комиссия раиси Хитой компанияси маҳаллий фармацевтика компаниялар билан ҳамкорликда ZF-UZ-2001 вакцинасини 2021 йилда 300 миллион донагача ишлаб чиқиш қувватига эгалиги ҳамда Ўзбекистон аҳолиси сони ва ҳукумат талаблари асосида етарли миқдорда вакцина дозаларини етказиб бериши мумкинлигини билдирган. Бу 2021 йил охиригача мамлакат аҳолисини оммавий равишда эмлаш имкониятини яратади.

Шу мақсадда коронавирус инфекциясига қарши оммавий эмлаш тадбирларини ташкиллаштириш борасида кўрилаётган чоралар, ZF -UZ-VAC 2001 вакцинасидан 1 миллион доза харид қилиш ва мамлакатимиз аҳолисини ихтиёрий равишда оммавий эмлаш тадбирларига йўналтириш масаласини Олий Мажлис Қонунчилик палатасига муҳокамага киритиш бўйича республика махсус комиссиясининг қарори қабул қилинган.

Шунингдек, Халқаро Вакциналар Иттифоқи (GAVI) томонидан Ўзбекистонга 2,5 миллионга яқин AstraZeneca вакциналарининг бепул етказиб берилиши бўйича музокаралар олиб борилмоқда. Музокаралар якунига қараб ушбу вакциналарнинг дастлабки 800 минг донаси 2021 йилнинг март ойларида Ўзбекистонга келтирилиши кутилмоқда.

Эслатиб ўтамиз, Ўзбекистонда коронавирусга қарши эмлаш март ойининг биринчи ярмида бошланиши маълум қилинган. Бунда биринчи навбатда коронавирус юқиш хавфи даражаси юқори бўлган шахслар эмланади ва у фақатгина ихтиёрийлик тамойили асосида амалга оширилади. Ўзбекистонда коронавирусга қарши курашиш тадбирлари ва вакцина учун 3 триллион сўм ажратиш режалаштирилган. Ижтимоий ҳимояга муҳтож, ёши катта ва аҳолининг бошқа заиф қатламлари вакиллари коронавирусга қарши бепул эмланади.

Махсус комиссия қарорига кўра, Ўзбекистонда Россиянинг Гамалея илмий-тадқиқот маркази томонидан ишлаб чиқилган «Спутник V» вакцинасини қўллашга рухсат берилди.

«Gazeta.uz»нинг Корхоналар ва ташкилотларнинг ягона давлат реестри маълумотларига таяниб ёзишича, Jurabek Laboratories 1996 йил 12 августда рўйхатдан ўтган ва фармацевтика маҳсулотлари ишлаб чиқариш билан шуғулланади.

Фото: «Gazeta.uz»

Раҳбар сифатида Мунира Кариева, таъсисчи сифатида — «Журабек» хусусий корхонаси (67 фоиз) ва БААнинг Bravo Medical Equipment Trading Establishment (33 фоиз) кўрсатилган.

Компания сайтида Jurabek Laboratories бош директори Сардор Кариев эканлиги кўрсатилган. У 2019 йилдан буён Соғлиқни сақлаш вазирлиги ҳузуридаги Фармацевтика саноатини ривожлантириш агентлиги директори ҳисобланади. Jurabek Laboratories’га 2005—2019 йилларда бош директор бўлган.