Андижонда Афғонистон уруши фахрийларига 1 миллион сўмдан пул маблағлари тарқатилди, деб хабар беради ЎзА.
Маълум қилинишича, Андижонда Халқаро терроризм ва диний экстремизмга қарши ҳаракатларда қатнашган Собиқ совет қўшинлари ҳарбий контингентининг Афғонистондан олиб чиқилганига 32 йил тўлганлиги муносабати билан тадбир бўлиб ўтган.
Тадбир давомида вилоят ҳокими фахрий жангчиларнинг ҳар бирига 1 миллион сўмдан, жами 100 миллион сўм пул совға қилган.
Таъкидланишича, Афғонистондаги ҳарбий ҳаракатларда биргина Андижон вилоятидан 5,3 минг нафар йигит қатнашган. «Улар жангларда мардлик, жасорат намуналарини кўрсатиб, аксарияти турли медал ва орденлар билан тақдирланган. Жанглардан 673 нафар йигит ногирон бўлиб қайтган бўлса, 152 нафарига эса она юртга тирик қайтиш насиб этмаган», — дейилади хабарда.
Эслатиб ўтамиз, 2019 йилда Афғонистон урушида ҳалок бўлган 1514 нафар жангчи номлари киритилган хотира китобининг тақдимоти ўтказилган эди.
Изоҳ (0)