Шавкат Мирзиёев Жиззах вилоятининг умумий қиймати 35,5 трлн сўм бўлган инвестиция лойиҳалари билан танишди
Шавкат Мирзиёев 15 февраль, душанба куни Жиззах вилоятининг инвестиция лойиҳалари тақдимоти билан танишди, дея хабар бермоқда Президент матбуот хизмати.
Давлат раҳбарига мазкур вилоятда 2021 йилда амалга ошириладиган 515 та лойиҳа ҳақида маълумот берилди. Лойиҳаларнинг умумий қиймати — 35 триллион 500 миллиард сўм. Уларнинг натижасида йилига 25 триллион сўмлик маҳсулот тайёрлаш қувватига эга янги корхоналар, қарийб 23 минг иш ўрни ташкил этилади. 264 миллион долларлик импорт ўрнини босиш ҳамда 311 миллион долларлик экспорт имконияти яратилади.
Таъкидланишича, Жиззах вилоятида қурилиш материаллари, автомобилсозлик ва тўқимачилик саноати ҳамда қишлоқ хўжалиги тармоқлари катта салоҳиятга эга. Лойиҳаларни шакллантиришда ушбу соҳалар «драйвер» сифатида белгилаб олинган.
Масалан, қурилиш материаллари саноатида 8 та лойиҳа режалаштирилган. Улардан бири — базальт толаси ва ундан турли материаллар ишлаб чиқаришга қаратилган. 723 миллиард сўмлик мазкур лойиҳа учун бугунги кунда ер ажратилган. Корхона 2021 йил III чоракда ишга туширилиб, 205 та иш ўрни очилиши мўлжалланган.
Шунингдек, юқори маркали цемент, бетон плиталар, арматуралар, геосеткалар ишлаб чиқариш бўйича ҳам истиқболли лойиҳалар бор.
Автомобиль саноатида ҳам лойиҳалар кўзда тутилган. Масалан, микроавтобус, тижорат ва юк автомобиллари ишлаб чиқариш бўйича лойиҳа ички бозор учун ғоят зарур. Бу корхона 2021 йил якунида фойдаланишга топширилиб, 500 киши иш билан таъминланиши режалаштирилган.
Жиззах шаҳрида ташкил этиладиган тўқувчилик мажмуаси маҳаллий хом ашёни чуқур қайта ишлаш, хотин-қизлар бандлигини оширишда муҳим ўрин тутади. 39 миллион долларлик мазкур корхона қурилиши 2021 йил ёзда бошланиб, 2022 йил ишга туширилади.
Тоғли ҳудудларда доривор ўсимликлар етиштириш, уларни қайта ишлаб, экспорт қилиш — давлат раҳбари кўрсатиб берган улкан имкониятлардан бири. Бугунги кунда мамлакатда шу соҳага ихтисослашган 7 та кластер фаолият юритмоқда. Хусусан, BMB Trade Group кластери томонидан Бахмал туманида заъфарон етиштириш ва қайта ишлаш йўлга қўйилмоқда. 30 миллион доллардан зиёд қийматдаги ушбу лойиҳа натижасида 200 киши ишли бўлади.
Шунингдек, қишлоқ хўжалигида чорвачилик, паррандачилик, гўшт ва сутни қайта ишлаш, ипак мато ишлаб чиқариш каби бир нечта лойиҳалар мўлжалланган.
Тақдимотда ушбу лойиҳаларнинг иқтисодий самарадорлиги, молиялаштириш манбалари ва инфратузилма масалалари муҳокама қилинди.
Президент Шавкат Мирзиёев Жиззах вилоятининг салоҳияти бундан анча катта эканини, кўплаб йирик лойиҳаларни амалга ошириш мумкинлигини таъкидлади. Тўқимачиликда маҳаллийлаштиришни чуқурлаштириб, тайёр маҳсулотлар ишлаб чиқариш, янги ўзлаштирилаётган ерларда талаб юқори мева-сабзавотлар етиштириб, озиқ-овқат хавфсизлигини таъминлаш, ерости маъданларини ўзлаштиришга хорижий инвестициялар жалб этиш бўйича топшириқлар берилди.
Бундан аввал Шавкат Мирзиёев Самарқанднинг туризм салоҳиятини ривожлантиришга доир тақдимот билан танишгани, вилоят раҳбарларига 2021 йилда 1,6 миллиондан ортиқ иш ўрни яратиш бўйича топшириқ бергани ҳамда давлат активларини хусусийлаштиришни тезлаштириш бўйича топшириқ бергани ҳақида хабар берилганди.
