Адлия вазири Ўзбекистонда митинглар ўтказиш СССР қонунлари билан тартибга солиниши ҳақидаги маълумотларни рад этди

Адлия вазири иштирокида 15 февраль, душанба куни ўтказилган матбуот анжуманида Русланбек Давлетов Ўзбекистонда йиғилишлар, митинглар ва кўча юришларини ташкил этиш СССР Олий Кенгаши Президиумининг 1988 йилдаги фармони билан тартибга солиниши ҳақидаги маълумотларга нисбатан муносабат билдирди, дея хабар бермоқда «Дарё» мухбири.

«Бу ҳужжат бизда амал қилмайди. Чунки у ерда [президиум фармонида] ёзилган органлар, муносабатлар тизими бугунги кунда мавжуд эмас. Лекин бизнинг қонунчиликка асосан, яъни 1991 йилдаги ҳужжатда Ўзбекистон қонунчилигига зид келмаган қисми бўйича СССР ҳужжатлари амал қилиши қайд этилган. Аммо у ерда ёзилган меъёрлар ҳозирги, амалдаги қонунчиликка тўғри келмайди. Чунки бугунги кунда ‘райком’ йўқ-ку. Ҳокимиятни ‘раисполком’нинг ҳуқуқий вориси, деб қарай олмайсиз. Бу умуман бошқа-бошқа орган. Шунинг учун у [президиум фармонида] амалда эмас», — деди Давлетов.

Унинг таъкидлашича, Ички ишлар вазирлиги томонидан ишлаб чиқилган «Мажлислар, йиғилишлар ва намойишлар тўғрисида»ги қонун лойиҳаси қайта кўриб чиқиш учун юборилган.

«Биз лойиҳани кўрганмиз, аммо уни қайтариб юборганмиз. Адлия вазирлиги нуқтаи назардан ҳуқуқий экспертизада катта масалалар бўлгани учун қайтариб юборганмиз. Бу икки-уч марта қайта ишланди, лекин охирги вариантини биз кўрмадик ҳали. Аммо бу қонун, албатта, керак, лойиҳа бекорга ишлаб чиқилмади. У давлат дастурлари, кўрсатмалар асосида ишлаб чиқилган.

Таъкидлаш керакки, бу борада қонунбузарлик учун маъмурий ва жиноий жавобгарлик бор. Лекин тартиби бизда халқаро процессуал тартибга солинган. Оммавий тадбир сифатида қарорлар белгиланган, аммо ҳамма митинг ҳам оммавий тадбирга тушмайди. Шунинг учун бу бўйича қонуний нуқтаи назардан биз ишлашимиз керак бўлган масалалар мавжуд.

Мен бир нарсани тушунтирмоқчиман: Адлия вазирлиги ҳамма соҳадаги қонунчиликни яратадиган ташкилот эмас, биз ҳуқуқий сиёсат жиҳатдан юритамиз. Лекин ҳамма соҳадаги вазирликлар ўзининг давлат сиёсатини юритади. Масалан, соғлиқни сақлаш соҳасида сиёсатни юритадиган ташкилот унинг ўзи, ҳуқуқий нуқтаи назардан ҳам ҳужжатни ўзи ишлаб чиқади, сиёсатининг тагидаги ҳужжатни ўзи ишлаб чиқиши керак. Биз умуммиллий манфаатлар, умумдавлат ва умуммажбурий нуқтаи назардан кўриб, ўртада туриб, унинг жиловини ушлаб турадиган ташкилотмиз. Лекин соҳавий сиёсатни вазирликларнинг ўзи юритиши керак», — деди у.

Эслатиб ўтамиз, Ички ишлар вазирлиги Норматив-ҳуқуқий ҳужжатлар лойиҳалари муҳокамаси порталига муҳокама учун қўйилган «Митинг, йиғилиш ва намойишлар тўғрисида»ги қонун лойиҳаси юзасидан баёнот билан чиққан эди. Унда ИИВ матбуот хизмати амалдаги қонунчиликда йиғилиш, митинг ва намойишлар тушунчалари, уларни ташкил этиш ва ўтказиш тартибини белгиловчи норматив-ҳуқуқий ҳужжат мавжуд эмаслигини таъкидлаб ўтганди.

«Мазкур ҳуқуқий бўшлиқ ҳанузгача, Ўзбекистон Конституциясининг 33-моддасида кўрсатилган қоидаларни тўлиқ рўёбга чиқаришга имкон бермасдан келмоқда», — дейилган эди баёнотда.