Туркиянинг Бурса ҳудудидан Ўзбекистонга 2021 йилнинг 12 февралидан бошлаб помидор ва қалампир уруғликлари экспорти учун вақтинчалик тақиқ жорий этилди, дея хабар бермоқда «Ўздавкарантин» инспекцияси ахборот хизматига таяниб ЎзА.
Бунга сабаб мазкур ҳудудда жойлашган Bursa Tohumculuk Ziraat ve Tic.A.S. корхонасидан Ўзбекистонга келтирилган 85 килограмм помидор уруғида Помидор жигарранг бужмайиш вируси (Tomato brown rugouse fruit virus) аниқланди.
Ҳолат юзасидан 2021 йил 11 февралда Ўзбекистонга карантин остидаги маҳсулотларни олиб киришда белгиланган фитосанитария талаблари бузилганлиги тўғрисидаги хабарнома Туркия давлатининг ўсимликлар карантини ва ҳимояси бўйича миллий ташкилотига юборилди.
Қайд этилишича, бугунги кунга қадар Туркиянинг ваколатли органидан «Ўздавкарантин» инспекциясига жавоб хати келиб тушмаган. Помидор ва қалампир маҳсулоти уруғлигига қўйилган вақтинчалик чеклов Ўзбекистоннинг «Ўсимликлар карантини тўғрисида»ги қонуни ва Вазирлар Маҳкамасининг 2020 йил 19 февралдаги қарорига кўра ўрнатилди.
Инспекциянинг таъкидлашича, импорт билан шуғулланувчи тадбиркорлар экиш материаллари, кўчат ҳамда уруғликларни республика ҳудудига олиб келиш жараёнида Ўсимликлар карантини давлат инспекциясини олдиндан хабардор қилиши мақсадга мувофиқ. Бунда, маҳсулот импорт қилингунга қадар экспортёр давлатнинг карантин хизмати билан «Ўздавкарантин» инспекцияси масъуллари боғланиб, маҳсулот ҳақида батафсил маълумот тўпланади.
Эслатиб ўтамиз, 2020 йил 4 декабрь куни Ўзбекистондан Россияга экспорт қилинган қуритилган меваларда зарарли организм аниқланганди. Бироздан сўнг Россия Фарғона вилоятидан барча ўсимлик маҳсулотларини олиб киришни тақиқлади. Тақиқдан сўнг «Ўздавкарантин» Россиянинг помидорларга қўяётган тақиқига муносабат билдирди.
Россия томони шу каби тақиқларни кейинги икки ҳафта ичида Навоий ва Қашқадарё вилоятида етиштирилган маҳсулотларга ҳам жорий этган.
Шундан сўнг Фарғона вилояти ҳокими Хайрулло Бозоров Россияга юборилган помидордан чиққан касаллик Фарғонадаги бирорта иссиқхонада аниқланмагани ҳақида маълумот берган. Ҳокимнинг таъкидлашича, Россиянинг ваколатли органлари томонидан Фарғонада етиштирилган барча қишлоқ хўжалиги маҳсулотлари импортига қўйилган тақиқ вилоятга жуда салбий таъсир кўрсатади — тақиқ олиб ташланмаса, «Фарғонага оғир бўлади».
Шунингдек, «Юксалиш» умуммиллий ҳаракати етакчиси, Олий Мажлис Қонунчилик палатаси депутати Бобур Бекмуродов Россия томонидан Фарғона, Навоий ва Қашқадарё вилоятларида етиштирилган қишлоқ хўжалиги маҳсулотлари импортига қўйилган тақиққа муносабат билдириб, «бундай ҳаракатлар... Жаҳон савдо ташкилотига аъзоликни тезлаштириш лозимлигини яна бир бор эслатаётгани»ни таъкидлаб ўтган эди.
«Росселхознадзор» 2020 йилнинг 21 декабрь куни Россияга Фарғонадаги еттита корхонадан помидор ва қалампир олиб киришга ҳамда Ўзбекистондаги 34 та корхонадан помидор олиб кирилишига рухсат берди. Кейинчалик Россиянинг Ўзбекистон помидорлари импортини тақиқлашга асос бўлган ташхиси нотўғри бўлиб чиқди.
Изоҳ (0)