ЖССТ мутахассисларининг тавсиясига биноан кундалик меъёр ҳисобланган калориянинг 45—65 фоизи углевод бўлиши керак. Бу кунига 2000 калория қабул қилинса, шундан 225 ва 325 граммини углевод ташкил этиши кераклигини билдиради. Иложи борича мураккаб углеводларни ўз ичига оладиган дуккакли маҳсулотлар ва сабзавотлар истеъмол қилишни канда қилмаслик керак. Қуйидаги белгилар кузатиладиган бўлса, организмга углевод ҳар қачонгидан ҳам зарур бўлади.
Оғиздан бадбўй ҳид анқиши
Кетоз — организм энергия етмаганидан кейин эҳтиёжни ёғ ва оқсилдан олишга уринишидан келиб чиқадиган ҳолат. Кунига 50 граммдан кам углевод истеъмол қилганда кетоз кузатилиши мумкин бўлади ва бу оғиз ҳидланишида намоён бўлади. Буни бартараф қилиш учун кўпроқ сув ичиш ва углеводга бой маҳсулотларни истеъмол қилиш керак.
Кайфиятнинг ўзгариб туриши
Деярли барча углевод миқдорини камайтириб, парҳез қиладиганларда жиззакилик кузатилиб туради. Гап шундаки, углевод киши ўзини бахтиёр ҳис қилишига сабаб бўладиган серотонин гормонининг ишлаб чиқарилишида муҳим рол ўйнайди. Организмга углевод етишмаганда серотонин ишлаб чиқарилиши кескин камаяди ва одам жаҳлдор ва асабий бўлиб қолади.
Бош оғриғи
Углевод етарли миқдорда истеъмол қилинмаганда қондаги қанд миқдори камаяди ва бу бош оғриғига олиб келади.
Қорин шишиши
Углеводга бой бўлган маҳсулотларда ҳазм жараёни учун муҳим бўлган бошқа модда ва клетчаткалар ҳам бисёр бўлади. Клетчатканинг етишмаслиги эса қорин шишига олиб келиши мумкин.
Қабзият
Бу муаммо ҳам углеводга бой маҳсулотларни истеъмол қилмаганликда клетчаткалар етишмаслиги билан боғлиқ бўлади. Донли, дуккакли маҳсулотлар, кўкатлар ва карам организмдаги меъёрни тиклаб, ичаклар фаолиятини яхшилайди.
Энергия етишмаслиги
Оддий юмушлар бажарганда ҳам чарчаб қолиш ва энергия етишмаслигини ҳис қилиш ҳам углеводлар етишмаслиги билан боғлиқ. Мушаклар массасининг ривожланиши учун оқсил муҳим, аммо айнан углевод машғулот учун муҳим бўлган энергия билан таъминлайди.
Ақлий фаолият билан боғлиқ қийинчиликларнинг кузатилиши
Энергия нафақат тана, балки мия фаолияти учун ҳам муҳим саналади. Углевод миқдорининг кескин қисқариши, маълумотларни таҳлил қилиш, эслаб қолиш ва диққат қилишда муаммолар кузатилади.
Очлик ҳисси
Етарлича тановул қилганда ҳам очликни ҳис қилиш рационнинг тўғри эмаслиги, организмга углевод етишмаётганидан дарак беради.
Доимий равишда совуқ қотиш
Организмга углевод етишмаслиги гипотиреоз, яъни қалқонсимон без фаолиятининг сусайишига олиб келади. Қалқонсимон без томонидан ишлаб чиқариладиган гормонлар тананинг ички ҳароратига ҳам таъсир қилади ва шунинг ҳисобига совуқ қотиш ҳолати кузатилади.
Изоҳ (0)