Шифокорлар кундалик муҳим витамин ва минералларнинг учдан икки қисмини истеъмол маҳсулотлари орқали қабул қилиш кераклигини таъкидлайди. Аммо рационда баланс бўлмаса, қўшимчалар қабул қилишга тўғри келиши мумкин.
Калий
Организмда калий етишмаслиги юрак, буйраклар ва ҳатто мушаклар билан ҳам муаммо келиб чиқишига сабаб бўлади. Помидор, брокколи, картошка, цитрус мевалар, банан ва қуритилган мевалар калийнинг кони ҳисобланади. Аммо юрак ва буйракларни даволаш учун препарат қабул қилаётган вақтда қўшимча калий истеъмол қилмаслик керак.
Ёғ кислоталари
Омега-3 ёғ кислоталари инсон саломатлиги ҳамда қон-томирлар саломатлигини сақлаш учун муҳим саналади. Ушбу фойдали ёғ кислоталари ёнғоқ, ўсимлик ёғи, балиқ ва тухумда мўл бўлади.
C витамини
Мазкур витамин иммун тизими ва юрак учун аҳамиятли. Кунига 75 мг меъёр ҳисобланган C витамини булғор қалампири, апельсин, киви, брокколи ва брюссел карамида бисёр бўлади.
D витамини
Серқуёш ҳудудда яшаш билан ушбу витаминга бўлган эҳтиёж қопланиб қолмайди. D витамини, айниқса, куз ва қишда ҳар қачонгидан ҳам муҳим бўлади. Шу сабаб ҳам тухум, лосось ва пишлоқ истеъмол қилиш тавсия қилинади.
Темир моддаси
Вегетариан парҳезига амал қиладиганларда ўсиш, ривожланиш ва қон учун муҳим бўлган темир моддасининг етишмаслиги эҳтимоли катта. Мол гўшти, нон, ёрмалар, шунингдек, ловия, нўхат ва ясмиқ каби маҳсулотларда эса мазкур модда бисёр бўлади.
Кальций
Организм икки ўн йиллик давомида кальцийни захира қилиши мумкин, кейинчалик эса ушбу эҳтиёжни истеъмол маҳсулотлари ва қўшимчалар орқали қоплашга тўғри келади. 50 ёшдан кичик аёллар кунига 1000 мг, 50 ёшдан катталар эса ундан кўпроқ миқдорда кальций истеъмол қилиши керак.
Пробиотиклар
Ичаклар фаолияти учун муҳим бўлган пробиотикларни кўпчилик етарли миқдорда қабул қилмайди. Йогурт, тузланган карам ва кефир истеъмол қилиш орқали эса етишмовчиликни қоплаш мумкин.
Холин
Холин жигар саломатлиги, шунингдек, танадаги ҳужайраларни ёғ кислоталари билан таъминлаш учун аҳамиятли. 2015 йилда ўтказилган тадқиқотларда 89 фоиз одам кунлик меъёр ҳисобланган 550 мг холинни қабул қилмаслиги аниқланган. Мол гўшти, лосось, товуқ гўшти ва тухум холинни ўз ичига олади.
E витамини
Кунига 15 мг E витаминини қабул қилиш иммунитетни яхшилаб, сурункали касалликларда яхши самара беради. Мазкур витамин ёнғоқ, писта, жўхори, кунгабоқар ва соя ёғида бисёр бўлади.
Клетчатка
Клетчаткалар етишмаганда юрак касалликлари, шунингдек, бир неча турдаги саратоннинг келиб чиқиш хавфи юқори бўлади, қолаверса, ичаклар фаолияти ҳам меъёрда бўлмайди. Бу каби муаммоларнинг олдини олиш учун эса кунига 25 грамм клетчаткага бой маҳсулот истеъмол қилиш тавсия қилинади.
Изоҳ (0)