Италия Вазирлар Кенгаши коронавирус пандемияси ва COVID-19’нинг янги штамми тарқалиши билан боғлиқ чекловларни кучайтириш тўғрисида қарор қабул қилди, деб ёзмоқда «Интерфакс».
Истеъфога чиқаётган бош вазир Жузеппе Конте Италия ичида ҳудудлараро ҳаракатланиш учун қўйилган тақиқ 25 февралга қадар узайтирилганини эълон қилди.
Бундан ташқари, 14 февраль, якшанба кунидан бошлаб Абруццо, Лигурия, Тоскана ҳудудлари ва Трентино автоном вилоятидаги эпидемиологик вазиятга «тўқ сариқ даража» берилади. Натижада ушбу ҳудудларда бар, ресторан ва музейлар ёпилади.
Италиянинг қолган минтақалари «сариқ» зона бўлиб қолади: бар ва ресторанлар маҳаллий вақт билан соат 18:00 гача очиқ, кечаси мамлакатда комендантлик соати ҳукм суради.
Жонс Ҳопкинс университети маълумотларига кўра, COVID-19 пандемияси бошланганидан буён Италияда 2,7 миллионга яқин кишида касаллик қайд этилган. 93 мингдан ортиқ бемор инфекция оқибатида вафот этган, 2,2 миллион киши касалликдан бутунлай соғайган.
Аввалроқ Латвия пандемия туфайли икки ҳафтага чегараларини ёпгани ҳақида хабар берилганди. Мамлакатга кириш учун тақиқ 11 февралдан 25 февралгача амал қилади.
Буюк Британияда эса 15 февралдан бошлаб COVID-19 хавфи юқори бўлган давлатлардан ташриф буюрувчилар учун икки ҳафталик мажбурий карантин жорий этилади. «Қора рўйхат»даги мамлакатлардан қайтган фуқаролар ўн кунни «COVID-меҳмонхоналар»да ўтказиши керак.
Изоҳ (0)