Бутун дунёда коронавирусга қарши эмланганларнинг умумий сони 159,3 миллиондан ошди. Бу ҳақда «ТАСС»нинг ҳукуматлар, экспертлар ва ОАВ маълумотларига асосланган ҳисоб-китоблари гувоҳлик бермоқда.
Вакцина қабул қилганлар улуши аллақачон дунё аҳолисининг 2 фоизидан кўпроғини ташкил этмоқда. Ҳисоб-китоблар БМТ Аҳолишунослик жамғармасининг 2020 йил ўрталаридаги дунёда аҳоли сони 7 миллиард 795 миллион кишини ташкил этиши ҳақидаги маълумотларига нисбатан олинган.
Сўнгги етти кун ичида кунига ўртача 6 миллионга яқин киши эмланди. Шу билан бирга, 3 февраль куни биринчи марта эмланганлар сони коронавирус билан касалланганлар сонидан ошиб кетганди.
Эмланганларнинг аксарияти — 48 миллиондан ортиғи Қўшма Штатлар аҳолисига тўғри келади. Иккинчи ўринда Хитой — 40 миллиондан ортиқ, учинчи ўринда Буюк Британияда 14,1 миллионга яқин одам эмланди. Эмланганларнинг, тахминан, 65 фоизи мазкур мамлакатларга тўғри келади. Шунингдек, Ҳиндистон (7 миллион) ва Исроилда (6,2 миллион) ҳам эмлаш кампаниялари юқори суръатлар билан давом этмоқда.
Шу билан бирга, аҳолисининг энг катта улуши эмланган давлатлар Исроил (69,3%), Бирлашган Араб Амирликлари (49,8%) ва Сейшел ороллари (49,7%) ҳисобланади. Буюк Британияда жами аҳолининг 21,1 фоиздан кўпроғи, АҚШда эса 14 фоиздан ортиғи эмланган.
Россияда, «Спутник V» вакцинасини ишлаб чиққан Гамалея марказнинг илмий ишлар бўйича директор ўринбосари Денис Логуновнинг сўзларига кўра, 2,2 миллионга яқин россиялик ушбу препаратнинг биринчи дозасини қабул қилган.
Ўзбекистонда коронавирусга қарши вакцинация жараёни февраль ойининг охири, март ойининг бошида бошланиши мумкин. Айни пайтда мамлакатда Хитойнинг ZF 2001 вакцинаси синовдан ўтказилмоқда ва мазкур вакцина синовларида иккинчи доза билан эмланганлар 1000 нафардан ошди.
Шунингдек, Россиянинг «Спутник V» вакцинасини Ўзбекистонда ишлаб чиқаришни маҳаллийлаштириш режаси ҳам мавжуд. Россия ҳозирча Ўзбекистон мамлакатда «Спутник V» вакцинасини ишлаб чиқариш билан шуғулланадиган компанияни танлашини кутмоқда.
Изоҳ (0)