10 февраль куни Тошкент вилоятида 55 миллион сўмга яқин қалбаки 100 минг сўмлик купюраларни муомалага киритмоқчи бўлган шахслар қўлга олинди. Бу ҳақда вилоят ИИББ Ахборот хизмати хабар берди.
Маълум қилинишича, Тошкент шаҳрида яшовчи 1991 йилда туғилган Ф.Р. танишлари 1997 йилда туғилган Ж.Т. ва А.А. билан биргаликда ноқонуний равишда қалбаки пулларни ясаб, уларни муомалага киритиш мақсадида тайёрлаётган вақтида тезкор ходимлар томонидан далилий ашёлар билан ушланган.
Тадбир давомида ушланган шахслардан 58 дона кесилган, 490 дона кесилмаган қалбаки 100 минг сўмлик купюралар, рангли принтер, 2 қути махсус қоғозлар, пичоқ ва бошқа буюмлар далилий ашё сифатида олинган.
Мазкур ҳолат бўйича мазкур шахсларга нисбатан Тошкент тумани ИИБ Тергов бўлими томонидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) 2-қисми билан жиноят иши қўзғатилган.
Аввалроқ Шайхонтоҳурда қалбаки 50 минг сўмлик купюраларни ишлаб чиқариш билан шуғулланган хонадон фаолияти фош этилгани, Наманганда 50 минг ва 100 минг сўмлик купюраларни, Самарқандда эса 100 минг сўмлик купюрани қалбакилаштирган шахслар ушлангани ҳамда Каттақўрғонда қалбаки 300 долларни муомалага киритмоқчи бўлган шахс қўлга олингани ҳақида хабар берилганди.
Изоҳ (0)