Сирдарё вилоятида тадбиркорлар ва фуқароларга зўравонлик ўтказиш орқали товламачилик ва қўрқитиш йўли билан улуш ундириб келган жиноий гуруҳ аъзолари қўлга олинди. Бу ҳақда вилоят ИИБ ахборот хизмати хабар берди.
Маълум қилинишича, мазкур жиноий гуруҳ Гулистон шаҳар, Гулистон ҳамда Ховос туманларида истиқомат қилувчи фуқароларни жиноий гуруҳга маблағ тўламаганлиги сабабли доимий қўрқитиш, уларга жисмоний тазйиқ ўтказиш ва бошқа турдаги жиноятларни содир этиб келган. Жабр кўрганлар эса ҳаётлари ва оила аъзоларининг хавфсизлигини ўйлаб ҳуқуқ-тартибот идораларига мурожаат қилмаган.
11 февраль куни Сирдарё вилояти ИИБ ва ДХХ Сирдарё вилоят бошқармаси томонидан ўтказилган ҳамкорликдаги тезкор тадбирлар натижасида ушбу жиноий гуруҳнинг ноқонуний фаолиятига чек қўйилган.
Хусусан, Гулистон шаҳри ва туманида яшовчи фуқаролар, 1983 йилда туғилган «Маман» тахаллусли А.М., 1994 йилда туғилган М.А., 1968 йилда туғилган Х.Э., 1992 йилда туғилган З.А., 1991 йилда туғилган Э.О. ва 1984 йилда туғилган Э.С. ва 1994 йилда туғилган Х.Ш. ўзаро тил бириктириб, фуқароларга транспорт хизматини кўрсатувчи тадбиркорлар ва фуқаролардан ноқонуний улуш олаётган вақтида қўлга олинган.
Гуруҳ аъзоларининг яшаш жойларида ўтказилган тинтув давомида жиноятга алоқадор далилий ашёлар топилган ва улардан жабр кўрган шахсларнинг шикоят ва аризалари тўпланган.
Таъкидланишича, мазкур ҳолат юзасидан Сирдарё вилоят ИИБ Тергов бошқармаси томонидан Жиноят кодексининг 104-, 105-, 165-моддаларининг (қасддан баданга оғир шикаст етказиш, қасддан баданга ўртача оғир шикаст етказиш, товламачилик) тегишли қисмлари билан жиноят иши қўзғатилиб, жиноятчилар Жиноят-процессуал кодексининг 221-моддаси асосида ушланган. Ҳозирда тергов ҳаракатлари давом эттирилмоқда.
Аввалроқ ДХХ «Яллама» постида товламачилик билан шуғулланиб келган жиноий гуруҳни фош этгани, Тошкент вилоятида гиёҳванд моддаларининг ноқонуний савдоси билан шуғулланувчи гуруҳ аниқлангани тўғрисида хабар берилганди.
Изоҳ (0)