Ҳужумкор ярим ҳимоячи Сардор Рашидов фаолиятини «Пахтакор»да давом эттириши мумкин.
Айни вақтда ўзбекистонлик футболчи «Пахтакор» машғулотларида қатнашмоқда. «Пахтакор» матбуот хизматининг «Дарё»га маълум қилишича, футболчи ҳозирча жамоа билан бирга шуғулланмоқда ва «шерлар» билан музокара олиб боряпти.
Рашидовнинг сўнгги жамоаси «Қатар СК» клуби бўлиб, Сардор 2019 йилда «Насионал»дан қатарликлар сафига ўтганди. Рашидов 2020 йилнинг сентябрида «Қатар СК» билан шартномасини узайтиргани маълум қилинганди, бироқ футболчи ўша вақтдан бери жамоа ўйинларида қатнашмади.
Рашидов 2021 йилнинг 1 январидан эркин агент мақомида. Transfermarkt маълумотларига кўра, унинг трансфер қиймати 850 минг еврога тенг.
Рашидов фаолияти давомида «Бунёдкор» (2010—2015), «Ал-Жаиш» (Қатар, 2015—2017), «Ал-Жазира» (БАА, 2017-2018) ва «Локомотив» (2018) клубларида тўп сурган. Шунингдек, Ўзбекистон терма жамоасига номзод футболчи ҳисобланади.
Шунингдек, тошкентликлар матбуот хизмати ҳимоячи Акром Комилов борасидаги вазиятга ҳам тўхталиб ўтди. Аввалроқ ОКМК клуби Комиловни ижара асосида ўз сафига қўшиб олганини маълум қилганди, бироқ Акром ҳамон «Пахтакор»ни тарк этмаган. Таъкидланишича, томонлар ҳали келишувга эришмаган ва бу борада музокаралар олиб борилмоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)