Сирдарё вилоятининг Гулистон шаҳрида Миллий гвардия тизимига ишга киритиб қўйиш эвазига 1,5 минг доллар талаб қилган шахс ушланди.
Фото: «Дарё»
Маълум бўлишича, С.Э. юқори лавозимда ишловчи танишлари орқали У.Ж.ни Миллий гвардия тизимига киритиб қўйишни ваъда қилган. Бунинг эвазига 1500 доллар талаб қилиб, шундан 500 долларни Гулистон шаҳрининг «Янги бозор» ҳудудидаги автотураргоҳда олаётган вақтида ҳуқуқни муҳофаза қилувчи идоралар ходимлари томонидан ашёвий далиллар билан қўлга олинган.
С.Э.га нисбатан Жиноят кодексининг 168-моддаси (фирибгарлик) 1-қисми ва 28-, 211-моддаси (пора бериш) 1-қисми билан жиноят иши қўзғатилган. Айни пайтда тергов ҳаракатлари олиб борилмоқда.
Аввалроқ Миллий гвардия тизимига ишга киритиб қўйиш учун Қаршида 4,5 минг доллар, Самарқандда 27 минг доллар олган шахслар ушлангани ҳақида хабар берилган эди.
