Тошкент шаҳри Юнусобод тумани 18-мавзедаги дарахтга осилиб қолган чўл бургути қутқарилди, дея хабар қилмоқда шаҳар экология ва атроф-муҳитни муҳофаза қилиш бошқармаси матбуот хизмати.
Маълум қилинишича, 10 февраль, чоршанба куни Тошкент шаҳар Юнусобод тумани 18-мавзе 31-кўп қаватли уй олдидаги дарахт шохига чўл бургути учиш вақтида мувозанатини йўқотиши сабабли осилиб қолганлиги аниқланган.
Давлат инспекторлари зудлик билан қушни қутқариш чораларини кўриш учун махсус техникаларни жалб этди. Ўрнатилган махсус техника ёрдамида дарахт шохига илиниб қолган қушни қутқариб, Тошкент ҳайвонот боғи маъмуриятига қонуний тарзда ҳужжатлаштирган ҳолда топширди.
Маълум қилинишича, айни дамда чўл бургутининг ҳолати яхши бўлиб, назоратга олинган.
Бундан аввал Мўйноқда «Судочье-Акпетки» давлат буюртма қўриқхонаси ташкил этилгани, Навоийдаги хусусий ҳайвонот боғида сақланган ҳайвонлар реабилитация учун Тошкентга олиб келингани ҳамда «Қизил китоб»га киритилган қушларни овлаган браконьер ушлангани ҳақида хабар берилганди.
Изоҳ (0)