Mo‘ynoqda “Sudochye-Akpetki” davlat buyurtma qo‘riqxonasi tashkil etildi

Qoraqalpog‘istondagi Mo‘ynoq tumanida umumiy maydoni 280 507 gektar bo‘lgan davlat tabiatni muhofaza qilish muassasasi shaklidagi “Sudochye-Akpetki” davlat buyurtma qo‘riqxonasi tashkil etildi. Bu haqda Ekologiya va atrof-muhitni muhofaza qilish davlat qo‘mitasi matbuot xizmati ma’lum qildi.

Buyurtma qo‘riqxonasining asosiy maqsadi qirg‘oq landshaftlari, kanallar, kollektorlar va ulardagi suv oqimi, suv atrofida yashovchi qushlar, noyob, yo‘q bo‘lib ketish xavfi ostida bo‘lgan baliqlar, yirtqich qushlar va sut emizuvchi hayvonlarni saqlab qolish hamda ularni qayta ko‘paytirishdan iborat.

Vazirlar Mahkamasining “Qoraqalpog‘iston Respublikasida ‘Sudoche-Akpetki’ davlat buyurtma qo‘riqxonasini tashkil qilish to‘g‘risida” 2021-yil 8-fevraldagi qarori bilan Davlat ekologiya qo‘mitasiga 2021-yil yakuniga qadar Sudochye ko‘lini xalqaro ahamiyatga (Ramsar konvensiyasi) ega bo‘lgan suvli-botqoqli hududlar ro‘yxatiga kiritish bo‘yicha takliflar ishlab chiqish va Vazirlar Mahkamasiga kiritish vazifasi topshirilgan.

Eslatib o‘tamiz, Sudochye ko‘llar tizimi avval “Mo‘ynoq akva sanoat” DUK huzurida edi. Prezidentning 2019-yil 20- martdagi “Muhofaza etiladigan tabiiy hududlar sohasida davlat boshqaruvi tizimini takomillashtirish chora-tadbirlari to‘g‘risida”gi qarori bilan mazkur ko‘llar tizimi Davlat ekologiya qo‘mitasi tasarrufiga berilgan.

Ma’lumot uchun, hozirda 6 ta davlat qo‘riqxonasi, 1 ta majmua (landshaft) buyurtma qo‘riqxonasi, 6 ta tabiat bog‘i, 1 ta milliy bog‘, 11 ta tabiat yodgorligi, 2 ta biosfera rezervati, 12 ta buyurtma qo‘riqxonasi, 1 ta Jayron maxsus pitomnigi mavjud.

“Sudoche-Akpetki” davlat buyurtma qo‘riqxonasi tashkil etilishi natijasida ularning umumiy maydoni 3,521 million gektardan 3,801 million gektarga yoki O‘zbekiston hududining 7,84 foizidan 8,46 foizga ko‘paydi.