Тошкентнинг Яккасарой туманидаги Дўстлик (собиқ Бобур) боғи 49 йил муддатга чет эллик инвесторга топширилди, деб хабар бермоқда «Podrobno.uz» таниқли жамоат арбоби ва журналист Абу-Али Ниёзматовга таяниб.
«Ўзбекистон ҳукуматининг фармойиши билан Бобур (Дўстлик) боғи 49 йил муддатга хорижий инвесторга берилади. Инвестор Тошкентдаги ‘Экопаркъни бошқараётган Eurasia International Marketing МЧЖдир», — деган у.
Унинг қўшимча қилишича, айни пайтда ушбу компания боғни модернизация қилиш бўйича лойиҳа тайёрламоқда. Ушбу лойиҳа бир ой муддатда ҳукуматга тақдим этилиши лозим.
Журналист, шунингдек, айни пайтда ‘Экопаркъдаги теннис кортлари ўрнида спорт мажмуаси қурилиш ишлари жадал равишда олиб борилаётганининг гувоҳи бўлганини айтиб ўтган. Шу сабабли жамоатчилик Дўстлик боғи ўрнида ҳам қурилиш ишлари олиб борилиши мумкинлигидан хавотирга тушган.
Яккасасой туман ҳокими Анвар Сайфутдинов Дўстлик боғи ўрнида янги кўп қаватли бинолар қурилиши ҳақидаги хабарлар ҳақиқатга зид эканлигини билдирган.
Маълумот учун, Вазирлар Маҳкамасининг 2019 йил 9 июлдаги қарорида давлат-хусусий шериклик асосида берилиши мумкин бўлган 37 та маданият ва истироҳат боғи кўрсатиб ўтилган бўлиб, улар орасида Дўстлик боғи ҳам бор.
Эслатиб ўтамиз, Тошкентдаги Бобур номли истироҳат боғининг номи Шавкат Мирзиёевнинг 2017 йилнинг январидаги таклифи билан Дўстлик боғи деб ўзгартирилганди. Эски ҳайвонот боғи ўрнида қурилган боғ («Экопарк»)га эса Бобур номи берилди.
Изоҳ (0)