Tesla компанияси электрокарлар ва хизматлар учун Bitcoin криптовалютасини қабул қилишни режалаштирмоқда, деб хабар беради Motor. Шу муносабат билан Америка компанияси 1,5 миллиард долларлик биткоинларни сотиб олган, бунинг натижасида криптовалюта қиймати ўзининг тарихий максимумига — 47 минг долларга чиқиб кетган.
Tesla баёнотида таъкидланишича, Bitcoin’га сармоя киритиш — янгиланган инвестиция сиёсатининг бир қисми ҳисобланади. Унга кўра, компания операцион ликвидликни сақлаб қолиш учун кераксиз бўлган маблағларни рақамли активларга ва олтинга инвестиция қилишни режалаштирмоқда.
Биткоиннинг юқори волатиллиги ёки қийматининг ўзгарувчанлигига қарамай, Tesla сармояларини узоқ муддатга тикишни режа қилган. Америка компаниясининг ғоясига кўра, криптовалютага сармоя киритиш «мосланувчанлик ва пул воситаларидан келадиган даромадларни оширади».
Tesla баёнотидан кейин биткоин қиймати Binance биржасида 10 фоиздан ортиққа ошиб кетган — 44 минг долларга қадар кўтарилган. 9 февраль тонгида эса нарх яна уч минг долларга кўтарилган.
Январь ойида Tesla раҳбари Илон Маск Twitter’даги биографиясига #bitcoin хештегини бириктириб, ўзининг криптовалютага бўлган қизиқишига шама қилганди: мазкур ҳаракатнинг ўзи биткоин нархининг кескин кўтарилишига сабаб бўлган. Бундан ташқари, Маск ўзининг твитларидан бирида биткоинда тўловларни амалга оширишдан ҳеч қачон бош тормаслигини таъкидлаган.
Изоҳ (0)