«Формула-1»нинг етти карра чемпиони Льюис Хемилтон Porsche Taycan’да ҳаракатланиб ўз мухлисларини ҳайрон қолдирди. Интернетда Mercedes-AMG F1 жамоаси билан олтита совринни қўлга киритган британиялик рақобатчи фирманинг электромобилини бошқараётгани тасвирланган суратлар тарқалган. Хемилтоннинг Mercedes билан амалдаги шартномасининг йўқлиги вазиятни янада чигаллаштиради, деб ёзади Motor.
Оқ Porsche Taycan Turbo S’ни бошқариб кетаётган Хемилтоннинг сурати Daimler раҳбарларига ёқмаса керак, бироқ Льюис расман ҳеч қандай тартибни бузмаган бўлиши мумкин: пойгачининг Mercedes-AMG билан охирги шартномаси 2020 йилнинг декабрида тугаган, мавсумолди тестларига бир ойдан сал ошиқроқ вақт қолганига қарамай, янги шартнома имзолангани ҳамон эълон қилинмади.
Одатда «Формула-1» юлдузлари ўз иш берувчилари ва ҳомийларига содиқ бўлади: кундалик ҳаётида пойгачилар рақобатчи жамоанинг автомобилларида ҳаракатланмайди, агар у классик автомобиль ёки такси бўлмаса. Mercedes-Benz EQS электромобили премьерасидан олдин 761 от кучига эга Taycan Turbo S’да намойишкорона ҳаракатланиш — Хемилтон томонидан амалга оширилган ноодатий қадам ва Porsche’нинг улкан муваффақиятидир.
Mercedes-AMG F1 раҳбари Тото Вольфф бир неча бор Хемилтон билан янги шартнома имзоланишига шама қилган. Сўнгги муддат: 2 март куни чемпион жамоа янги W12 E Performance болининг тақдимотини ўтказади ва айнан шу куни пойгачилар билан интервью режалаштирилган.
Аввалроқ Porsche компанияси Британиянинг Brands Hatch Circuit трассасида Taycan 4S ва Turbo S серияли моделларини бардошлилик синовидан ўтказгани, бир неча соат давом этган минг километрли ҳаракатланиш давомида электромобиллар Буюк Британияда 13 та рекордни ўрнатгани тўғрисида хабар берилганди.
Изоҳ (0)