Тошкентда ички ишлар ходими кийимини кийиб, машина капоти устида видеога тушган йигит ва унинг шериги 5 суткага қамалди

Ижтимоий тармоқларда ички ишлар ходими формасини кийиб олиб, автомобиль капоти устига чиққан йигит видеоси тарқалди. Тошкент шаҳар ИИББ ушбу видеотасвир бўйича маълумот берди.

Маълум қилинишича, 2021 йил 6 февраль куни Интернет тармоғида тарқалган видеода ички ишлар органлари ходимининг формасида бўлган номаълум шахс автотранспорт капотида бўла туриб йўл бўйлаб ҳаракатланган. Мазкур видеолавҳани суратга туширишда қатнашган кишиларнинг шахслари Юнусобод тумани ИИО ФМБ ходимлари томонидан аниқланди.

Текширув давомида аниқланишича, 2021 йил 18 январь куни 24 ёшли Абдураҳмон З. таниши 24 ёшли Алим К. билан бирга видеолавҳа суратга олиш ниятида дўконлардан бирида ички ишлар органи ходимининг формасини ижарага олган, шунингдек, бозордан йўл-патруль хизмати ходимининг жезлига ўхшаш жезл ҳам харид қилган.

Мазкур шахслар таниши 34 ёшли Отабек К.дан давлат рақами 10 G 603 SA бўлган «ВАЗ-2106» русумли автомобилни вақтинчалик фойдаланиш ниятида олган, аммо уни бошқаришга ҳуқуқи бўлмаган.

Шундан сўнг Юнусобод тумани, Турғунбоев кўчаси, «Ифтихор» маҳалласида Алим К. ички ишлар органи ходимининг формасини кийган ҳолда қўлида жезл билан автомобиль капотига ётган. Шу тарзда ҳуқуқни муҳофаза қилиш органлари ходимларининг обрў ва шаънига зарар етказувчи видеолавҳа суратга олиниб, Интернет тармоғида тарқатилган.

Иккала шахсга нисбатан Маъмурий жавобгарлик тўғрисидаги кодекснинг 183-моддаси (майда безорилик) ва 209-1-моддаси (вазирликлар, идоралар ва ташкилотлар ходимларининг формали кийим-бошини қонунга хилоф равишда кийиб юриш) бўйича маъмурий баённомалар расмийлаштирилди.

Бундан ташқари, Абдураҳмон З.га нисбатан транспорт воситасини ишончномасиз бошқаргани учун Маъмурий жавобгарлик тўғрисидаги кодекснинг 135-моддаси (транспорт воситалари эгаларининг фуқаролик жавобгарлигини мажбурий суғурта қилиш тўғрисидаги қонун ҳужжатларининг талабларини бузиш) бўйича баённома расмийлаштирилди. Автомобиль эса жарима майдончасига жойланди.

Юнусобод тумани жиноят ишлари бўйича суди томонидан Алим К. ва Абдураҳмон З.га нисбатан беш суткалик маъмурий қамоқ жазоси белгиланди.

Бундан аввал Сирдарёда ички ишлар ходими кийимида рақсга тушган йигит 8 суткага қамалгани, Бухорода давлат рақам белгисини сохталаштириб, қонундан қочишга уринган ҳайдовчилар аниқлангани ҳамда ижтимоий тармоқларда тарқалган видеолар сабаб 28 нафар ички ишлар ходими лавозимидан озод этилгани ҳақида хабар берилганди.