Жанубий Кореянинг Hyundai автомобилсозлик компанияси Буюк Британияда eVTOL-аппаратлари учун биринчи аэропортни қуради. Объект Ковентри шаҳрида жойлашади ва келажакда янги аэротаксилар бозоридаги лойиҳалар учун тест майдончасига айланади, деб хабар беради «Korrespondent.net».
«Келажак авиамобиллари учун инновацион ерусти инфратузилмасини хизмат сифатида тақдим этамиз. Бошқарилувчи ва учувчисиз бошқариладиган транспорт воситалари учун ўта ихчам, тез қуриладиган, кўп функцияли операцион марказ самолётларни бошқариш, қувватлантириш, юкларни ортиш каби вазифаларни бажаришга хизмат қилади», — дейилади Hyundai баёнотида.
Аir-One ишчи номини олган лойиҳа Hyundai ва Urban Air Port компаниялари муҳандисларнинг ҳамкорлигидаги иши ҳисобланади.
«Платформа модуль архитектураси базасида қурилган ва аэропортнинг ўзи учун юқори мобиллик даражасига эга — Аir-One’нинг конуссимон конструкцияси уни тез ўрнатиш, бошқа жойга кўчириш ва яна йиғиш имконини беради», — дейилади лойиҳа изоҳида.
Лойиҳага кўра, турли типдаги қувватлантириш станциялари, йўловчилар учун кутиш ва дам олиш зоналари қўниш конуси остида жойлашади. Парвоз майдончасининг диаметри эса 40 метр атрофида бўлади ва турли eVTOL-аппаратларининг қўнишини таъминлайди.
Ихтирочиларнинг сўзларига кўра, Аir-One’нинг асосий мақсади — барқарор ҳаво мобиллигига қўйилган чекловлардан воз кечиш ва аэротакси ҳамда бошқа ҳаво транспортлари учун карбонат ангидридсиз экотизим яратишдан иборат.
Шунингдек, Urban Air Port денгиз ва осмонўпар бинолар томида қўниш портларини яратган. Яқин келажакда ҳамкорлар бутун дунё бўйлаб 200 дан ортиқ шу турдаги объектларни ўрнатиш ва eVTOL-аппаратларига бўлган глобал талабга мос равишда жойлаштиришни босқичма-босқич тезлаштириш ниятида.
Ковентридаги биринчи майдончанинг қурилиш ишлари шу йилнинг охирига қадар якунланади.
Аввалроқ Сингапурда 42 минг уйга мўлжалланган экошаҳар қурилиши, илк уйлар 2023 йилдан фойдаланишга топширилиши кутилаётгани тўғрисида хабар берилганди.
Мавзуга доир: Германияда автомобиллар киритилмайдиган шаҳар қурилади
Изоҳ (0)