Пойабзалдан ёмон ҳид келиши фақат эркакларда бўлади деб ҳисобласангиз, адашасиз. Бундай ёқимсиз ҳид кўплаб комплексларнинг сабабчисига айланади ва ноқулайлик туғдиради. Бундан қандай қилиб қутулиш йўллари ҳақида маълумот берамиз.
Пойабзал учун спрей
Оёқ кийимдаги ҳидни йўқотиш учун кўплаб тайёр воситалар мавжуд. Улардан спрей шаклидагисини танлаган маъқул. Чунки пойабзални крем билан артиш қулай эмас, кукун кўринишидаги воситалар эса пайпоқ ва колготкаларда оқ доғ қолдириши мумкин.
Махсус шарчалар ва пакетлар
Кечаси махсус шарчаларни ботинка ёки этик ичига солиб қўйсангиз, улар ортиқча намликни шимиб олади ва ёқимсиз ҳидларни йўқотади. Бундай воситалар кўпинча спорт маҳсулотлари дўконларида сотилади.
Бир марталик пойабзал таглиги
Шунингдек, пойабзалингизни яхши сақлаш учун оёқ кийим тагликларини нам антибактериал салфеткалар билан артиш ёки бир марталик таглик сотиб олиб, алмаштириб ишлатишингиз мумкин.
Перекис ва нашатир спирти
Халқона усул: нашатир спирти ва водород пероксидни аралаштиринг, эритмани пуркагичли идишга қуйиб, пойабзалнинг ички қисмига яхшилаб ишлов беринг.
Сирка
40 фоизли сиркада намланган пахтани пойабзал ичига солиб қўйинг. Сирка чарм пойабзалга зарар етказмайди, аммо резина қисмларига тегмагани маъқул. Сирка билан тозаланган пойабзални очиқ ҳавода қолдириш лозим, чунки сирка ҳиди бир неча кунгача сақланиб қолади.
Антибактериал воситалар
Хлоргексидин ёқимсиз ҳиддан халос бўлишда самарали ёрдам беради, уни пойабзал ичига сепиб, бир неча соатга қолдиринг. Хлоргексидин пойабзалдаги замбуруғларни йўқ қилишда ҳам яхши натижа беради.
Электр қуритгич
Бундай қуритгичларнинг ҳар бир оёқ кийим учун мўлжаллангани мавжуд. Электрон қуритгич пойабзални ичига ҳаво юбориб қуритади, шунинг учун пойабзалга зарар етмайди. Баъзан қуритиш жараёни 1 соатдан 3—4 соатгача давом этиши мумкин. Бу қулай, чунки пойабзални уй шароитида бу қадар тез қуритиб бўлмайди. Қуритгичларнинг ҳар хил ўлчамдагиси мавжуд, аммо аёллар ва болалар пойабзалига бемалол сиғадиган кичикроқ қуритгични танлаган маъқул.
Изоҳ (0)