Қандай қилиб дунёнинг энг бадавлат кишисига айланиш мумкин: Жефф Безосдан муваффақиятга эришиш бўйича 10 тавсия

Amazon компанияси асосчиси Жефф Безос сайёранинг энг бадавлат кишилари рўйхатидан ўрин олган. 2020 йилга қадар бизнесида фақатгина ўсиш ва муваффақият кузатилган ишбилармоннинг бизнес билан шуғулланишни истовчилар фаолиятида қўл келадиган тавсияларини эътиборингизга ҳавола этамиз.

Ақлга эмас, юракка қулоқ солинг

Кўпинча ақл мақсадларга эришишга тўсқинлик қиладиган йўл кўрсатиши мумкин. Масалан, бирон нарса бошлашдан аввал эҳтиёт бўлиш кераклигини уқтиради. Юрак ботирликка ва амалга оширишга ундаши, ақл эса бунга йўл қўймаслиги мумкин. Бирор нарсага эришишдан аввал тажрибангиз йўқлигидан ташвишланманг, асосийси, эплай олишингизга ишонинг ва ўзингизни синаб кўришдан чўчиманг. Ғалабага эришиш учун таваккал қилиб кўриш керак.

Ҳеч қачон афсусланманг

Бизнесда ортга қараб вақт сарфламасдан, олға интилишни билиш муҳим. Афсус ва армонсиз одам бўлмайди, аммо ҳаётингизга салбий таъсир қилиши мумкин бўлган фикрлар олдингиздаги очилиши мумкин бўлган имкониятларга таъсир қилишига йўл қўйманг. Ортга фақат мақсадларингизга эришганингиздан сўнггина қаранг, унга қадар ҳаётингизда афсусга ўрин бўлмасин.

Маҳсулот ёки лойиҳага эътибор жалб қиладиган ном қўйинг

Кўпинча маҳсулот унинг номи ва у билан боғлиқ тафсилотлар билан диққатга сазовор бўлади. Маҳсулот номининг ноаниқ ёки мужмаллиги эса унинг дўкон пештахтасида чанг босиб ётишига сабабчи бўлиши мумкин. Қизиқиш ортиши учун потенциал мижозларда ҳайрат уйғотадиган, камида бу нима экан деб қарашга ундайдиган ном танлашингиз керак.

Сифат муҳимлигини унутманг

Бизнесда кимларнингдир ҳақ-ҳуқуқлари учун курашишингиз унчалик муҳим бўлмаслиги мумкин, аммо сифат билан боғлиқ масалага юзаки қарамаслик керак. Сиз ишлаб чиқарган маҳсулот истеъмолчи эҳтиёжига жавоб бериши — исталган бизнесда муваффақиятга эришишнинг гарови.

Маҳсулотни маркетингдан муҳимроқ билинг

Маҳсулотнинг сифатли ва яхши бўлишига эътибор ва маблағ қанча кўп сарфланса, унга бўлган талаб ва харид қилишга бўлган хоҳиш шунча кўп бўлади. Мижозлар сизнинг реклама ва пиарингиз яхши эканлиги учун эмас, маҳсулотингиз бошқалардан ажралиб тургани учун мурожаат қилсин. Компаниянгиз маркетинг стратегияси зўр, аммо маҳсулот талабга жавоб бермайдиган бўлса, бизнесингиз узоққа бормайди.

Мижозлар хоҳиши ва қизиқишидан келиб чиқиб ёндошинг

Истеъмолчи ва мижоз эҳтиёжларини инобатга олиш бизнеснинг асосий принципларидан бири ҳисобланади. Одамлар нимани хоҳлаётгани, уларнинг маҳсулот ҳақидаги фикри ва таклифлари қандайлиги билан қизиқинг. Улар томонидан берилган баҳо ва мулоҳазалар ижобий бўлса, миннатдорчилик билдиришни унутманг. Мижозларининг фикри ва қарашларини инкор қилиб, фақат даромадни кўзлаган бизнес ишонч билан бирга мижозларини ҳам йўқотади.

Сифатли маҳсулотга одамлар харид қилишга қурби етадиган нарх қўйинг

Севимли нарса ва буюмларини ишлаб чиқаришга аслида қанча маблағ сарфланишидан хабар топган одамлар кўпинча ҳайрон қолади. Баъзи товарлар тайёрланиш жараёни ва кам учрайдиган материаллардан ишлангани сабаб қиммат бўлади. Аммо кўп ҳолларда ишлаб чиқаришга унчалик кўп маблағ сарфланмайди, нархнинг қимматлашиши эса чакана савдо билан шуғулланадиган савдогарлар ҳисобига бўлади. Шу сабаб рақобат муҳитида маҳсулотингизга чакана савдо қиладиганларга нисбатан арзонроқ нарх белгилаганингиз яхши.

Лойиҳа ёки маҳсулотингизда ўзига хослик бўлсин

Аксари тадбиркор ва бизнесменлар ишлаб чиқаришда янгилик киритишда кўра тайёр амалиётни қўллашни ва кўчириб олишни афзал билади. Сиз эса бошқалардек бўлманг. Маҳсулотингизда ўзига хослик мужассам бўлсин (Безос Amazon’га қадар онлайн савдо деярли мавжуд бўлмаганини таъкидлайди).

Ишингизни иштиёқ билан бажаринг

Жараён қизиқ бўлиши учун ишингизни бажонидил бажараётган бўлишингиз керак. Иштиёқсиз бизнес механик ва жонсиз бўлиб қолади ва иш завқ оладиган жараён эмас, шунчаки пул топиш учунгина қилиниши керак бўлган мажбуриятга айланади. Алал-оқибат ҳаётингиз ишга бориш ва келишдан, кун чиқиши ва кун ботишини кутишдан иборат, мазмунсиз кетма-кетлик бўлиб қолади.

Таваккал қилишдан қўрқманг

Ҳатто муваффақиятсизлик кутилишига қарамай, баъзида ишга бош билан шўнғишга тўғри келади. Энг ёмони, ҳар қандай бизнесда омадсизлик ва кутилмаган натижага дуч келиш мумкин. Аввал сизда бўлмаган нарсаларга эришиш учун олдин қилиб кўрмаган ишларни бажаришга тайёр бўлишингиз керак.