Бекажонлар учун: 15 дақиқада дераза тозалаш сирлари

Қиш фасли охирлаши билан деразаларни тозалаш ишлари бошланади. Бунинг энг тез ва самарали усули билан танишиб олинг.

Булутли кун – энг яхши вақт

Биринчи қоидани унутмаслик лозим: булутли кунда деразаларни тозалаш яхшироқ. Сабаби қуёшда дераза ювиш воситаси тез қуриб қолади. Шунчаки яна нам мато билан дераза артиш эса ортиқча вақтни олиши мумкин. Бундан ташқари, қёш нури туфайли деразада доғлар ҳам тезда пайдо бўлади.

Деразаларни қандай тозалаш керак: энг яхши восита

Албатта, дераза тозаловчи воситалар ҳам яхши, аммо оддийгина сирка ва сув ҳам бундан қолишмайди. Бунинг учун сирка ва илиқ сув 1:8 нисбатда аралаштирилади, иложи бўлса 10 томчи лимон эфир мойи ҳам қўшилади. Озроқ ҳиди бўлиши мумкин, аммо у тез орада йўқолади.

Доғларсиз тозалаш

Бунинг учун деразалар ҳар хил йўналишда тозаланиши керак. Тозалагични аввал юқоридан пастга, сўнг ўнгдан чапга қараб ҳаракатлантириш лозим. Шундагина ҳар қайси томонда мавжуд бўлган доғлар тозаланади.

Ромларни қандай тозалаш керак?

Бу тиш чўткаси ёрдамида ҳам амалга оширилиши мумкин. Дастлаб ифлосланган рамкалар бурчагига истеъмол содаси, сўнгра сирка сепилади. Аралашма кўпира бошлайди. 15 дақиқадан сўнг чўтка ёрдамида бурчакдаги кирлар марказга тўпланиб, тозалаб олинади.

Махсус тозалагичлар

Ушбу тозалаш воситаси матоларга қараганда анча қулай. Агар деразанинг аҳволи жуда ёмон бўлса, унда дастлаб мато билан, сўнгра махсус восита билан тозалаш керак.

Меламин шимгич

Ромлардаги ҳар қандай доғларни меламин шимгич бир зумда тозалайди. Шундан сўнг ромлар янги ва оппоқ кўринишга келади. Фақат шимгичларни катта юзаларга ишлатмаслик зарур, у ишқаланиш давомида ўз ҳажмини йўқотади. Қор ва ёмғирдан қолган аралаш кирларни мато, бошқа доғларни эса шимгич ёрдамида тозалаш тавсия этилади.

Телескоп тозалагич

Қўл етмайдиган ёки тозалаш хавфли бўлган жойларни телескоп тозалагич ёрдамида артиш мумкин. Ҳозир уни барча дўконлардан харид қилса бўлади.

Катта деразалар учун чангютгич

Уйда деразалари кўп бўлган бекажонлар учун фойдали қурилма. Бу вақтни тежаш билан бирга, деразаларни кўнгилдагидек тозалайди. Дастлаб деразанинг ўта кир жойлари мато ёки бошқа восита билан тозалаб олинади. Сўнгра чангютгич ёрдамида деразалар тозаланади. Лекин ром ва токчалар мато ёрдамида артилиши керак.

Темир курак

Агар деразаларда бўёқдан ёки ёпишқоқ бирор буюм натижасида доғлар қолган бўлса, у ҳолда темир курак ёрдамга келади. Ушбу восита деразаларни қирмасдан ва бошқа зарар етказмасдан доғларни осонгина бартараф этади.

Дераза учун суюқ тозалаш воситалари

Бу катта йўл ёқасида ёки чанг ва ширали дарахтлар соясидаги деразалар учун айни муддао. Ушбу восита деразаларга сепилганидан сўнг бироз вақт ўтмай, дарров деразадаги доғларни ювиб тушади.