Думалоқми ёки тўртбурчак? Юз шаклига қараб қандай кўзойнак танлаш керак?

Турли шаклдаги юз эгаларига қандай кўзойнак тақиш ярашиши ҳақида «Линзмастер» оптикаси раҳбари, мутахассис жавоб беради.

Овал шаклидаги юз эгалари учун

Белгилари: Ёноқлар бўртган, ияк бироз думалоқ шаклда, пешона ўртача кенгликда.

Бундай юз эгаларига исталган моделдаги кўзойнак ярашади. Фақат иложи борича ҳаддан ортиқ кичкина ва катта кўз аксессуари танламаган яхши. Кўзойнак кенглиги юзнинг кенг қисмига тенг ёки бироз кенгроқ бўлгани маъқул.

Думалоқ юз эгалари

Белгилари: Юз контури бир текисда бўлади, юзнинг узунлиги ва кенглиги деярли бир хил.

Бундай юз эгаларига думалоқ шаклдаги кўзойнаклардан қочиш тавсия қилинади, чунки аксессуар юзни янада думалоқ эмас, юз пропорциясини узунроқ кўрсатиши керак. Квадрат ёки тўғри тўртбурчак шаклдаги моделлар бу борада айни муддао. Шунингдек, шакли капалакни эсга соладиган ва cat eyes кўзойнаклари ҳам ярашиши мумкин. Тўқ рангдаги аксессуар юзни ихчамроқ, оч ранглиси эса аксинча бошқача кўрсатади.

Квадрат шаклдаги юз эгалари учун

Белгилари: Кенг ияк ва ёноқлар, пешона кенглиги ҳам ёноқлар ўртасидаги фарқчалик катталикда.

Бундай юз эгаларига думалоқ шаклдаги ёки авиатор кўзойнаклари жуда ҳам ярашади. Оч рангда бўлса, яна яхши. Кўзойнак кенглиги юз кенглиги билан пропорсионал бўлишига эътибор қаратинг. Тўғри тўртбурчак ва квадрат шаклдаги аксессуарлардан эса қочиш тавсия қилинади.

Учбурчак юз эгалари

Белгилари: Кенг пешона ва чўзинчоқ ияк.

Юз шакли бундай кўринишга эга бўлган қиз ва аёлларга cat eyes кўзойнакларини тақмаслик, кичкина ва думалоқ моделларга эса эътибор қаратиш тавсия қилинади. Асосий қоида: юзнинг юқори қисмига урғу берманг, бу пешонани янада кенг, иякни эса кичкина кўрсатади.