Идиш ювиш воситасини бошқа мақсадларда ҳам ишлатиш мумкинлигини биласизми? Ушбу маҳсулот бир қанча фойдали хусусиятларга эга. Улардан баъзилари ҳақида тўхталиб ўтамиз.
Бегона ўтларни йўқ қилиш
Бегона ўтларни турли заҳарли моддалар билан йўқотишда оддийроқ усул бор: 1 ош қошиқ идиш ювадиган суюқликни 1 стакан туз ва 4,5 литр сирка билан аралаштиринг. Аралашмани махсус идишга қуйинг ва бегона ўтларга сепинг.
Эҳтиёт бўлинг: суюқлик гулларга ва фойдали ўсимликларга тушмаслиги керак!
Совуқ компресс тайёрлаш
Яхши ёпиладиган герметик пакетга идиш ювиш воситасини қуйинг ва музлаткичга қўйинг. Бундай ҳароратда совун музламайди, лекин восита таркибидаги гел совуқни узоқ вақт ушлаб тура олади. Енгил жароҳат ва кўкаришларда бу нарса жуда асқатади!
Пашшалардан қутулиш
Агар сизни ҳашаротлар безовта қилаётган бўлса, уларни оддий усул билан йўқ қилиш мумкин. Стаканнинг ярмини оқ ёки олма сиркаси билан тўлдиринг, унга 6-8 томчи идиш ювадиган суюқлик қўшинг. Қалин кўпик пайдо бўлгунча илиқ сув билан тўлдиринг. Стаканни пашшалар кўп бўлган жойга қўйинг. Ёқимли ҳид ҳашаротларни ўзига тортади, идишдаги ёпишқоқ суюқлик эса уларнинг ташқарига чиқишига йўл қўймайди.
Эшик ғичирлашидан халос бўлиш
Агар эшикларингиз ғичирлаётган бўлса, қиммат воситаларга пул сарфламанг – бу муаммони оддий идиш ювиш воситаси билан ҳал қилиш мумкин. Суюқликнинг оз миқдорини ғичирлаётган қисмларга қуйинг, бир текисда тақсимланиши учун эшикни бир неча марта очиб ёпинг.
Хонаки гулларни парваришлаш
Хонаки ўсимликларни турли ҳашаротлар зарарламаслиги учун токсик бўлмаган воситалардан фойдаланинг. Икки чой қошиқ идиш ювадиган суюқликни бир стакан илиқ сувда эритиб, ўсимлик баргларига сепинг. Ушбу аралашма шира, оқ пашшани йўқ қилишда самара беради.
Ёдда тутинг: бунинг учун турли қўшимчалар — кимёвий моддалар, хлор ва антибактериал компонентларсиз энг оддий маҳсулотни танланг.
Ёғли доғларни кетказиш
Маҳсулотнинг ёғ эритувчи хусусиятидан нафақат идиш юваётганда, балки кийим, гилам, кафелдаги ва бошқа ёғли доғ ҳамда кирларни тозалашда ҳам фойдаланиш мумкин. Аммо таркибида оқартирувчи модда бўлмаган суюқликдан фойдаланинг.
Болалар учун пуфакчалар тайёрлаш
Сайрга чиққан бола, албатта, пуфланадиган совун кўпикларини олиб беришингизни сўраб хархаша қилади. Кичкина болалар уларни доимо тўкиб юборади, ҳатто сайр охирига қадар ҳам етмайди. Сизга янада тежамкор вариантни таклиф этамиз. 2-3 стакан идиш ювадиган суюқликка 2-3 чой қошиқ глицерин қўшинг. Аралашмани тўрт литр сувга аралаштиринг. Бундай суюқлик узоқ вақтга етади, бундан ташқари, қанча кўп турса, шунча яхши пуфланади.
Изоҳ (0)