Россиялик мухолифатчи Алексей Навальний штаблари раҳбари Леонид Волков сиёсатчининг сафдошлари 14 февраль куни норозилик акциясини ўтказишни режалаштираётганини маълум қилди, деб ёзади Meduza.
«Биз бугун-эрта унинг формати ҳақида гапириб берамиз. Чунки бу умуман бошқача формат бўлади. Биз энди янада айёрроқ бўламиз ва бевосита полиция билан ҳамкорлик қилишга уринмаймиз», — деди Волков.
Кейинроқ Волков акциянинг янги формати қандай кўринишда бўлишига аниқлик киритди. «Россиянинг катта шаҳарлари»да яшовчиларга кечқурун ҳовлига чиқиб, телефонларидаги чироқларни ёқиш ва шу ҳолатда бир неча дақиқа туриш таклиф этилмоқда. Сўнг акцияда суратга тушиб, уни ижтимоий тармоққа жойлаш лозим. «Ҳеч қанақа ОМОН, ҳеч қанақа қўрқув бўлмайди. Балки, сизга бу 15 дақиқа ҳеч нарсани ўзгартирмайдигандек кўриниши мумкин. Аслида эса у ҳамма нарсани ўзгартиради», — деб ёзди Волков.
Берлиндан Москвага қайтганидан сўнг дарҳол ҳибсга олинган Алексей Навальнийни қўллаб-қувватловчи акциялар 23- ва 31 январь кунлари Россиянинг кўплаб шаҳарларида бўлиб ўтди. Норозилик акцияларида рекорд даражада кўп одам қўлга олинди, ўнлаб жиноят ишлари қўзғатилди.
2 февраль куни суд «Ив Роше» иши бўйича Навальнийга чиқарилган шартли муддатни ҳақиқийсига ўзгартириш ҳақида қарор қабул қилганидан кейин сиёсатчининг тарафдорлари Москва марказида акция уюштирди, унинг иштирокчилари ҳам полиция томонидан қўлга олинди. 5 февраль куни Леонид Волков яқин вақтлар ичида Навальнийни қўллаб-қувватлаб намойишлар ўтказилмаслигини эълон қилди. 8 февраль куни эълон қилинган мурожаатда ҳам Волков яқин орада норозилик акциялари режалаштирилмаётганини айтган эди.
Изоҳ (0)