Литвада истиқомат қилувчи спорт автомобилларининг ишқибози бўлган оила қордан Ferrari LaFerrari’нинг 1:1 масштабдаги нусхасини яратди. Машина нусхасини яратишда улар оддий куракча ва экологик тоза бўёқдан фойдаланган, деб хабар беради Motor.
Оила Ferrari LaFerrari’нинг қордан нусхасини яратиш учун икки кунга яқин вақт сарфлаган. Бу вақт ичида «конструкторлар» оддий куракча ёрдамида суперкарнинг ҳақиқий ўлчамидек келадиган нусхасини ясашга муваффақ бўлган. Қор нусханинг ғилдираклари, олд сплиттери, шунингдек, газ чиқарувчи трубалари жойлашган орқа бампери ва кузовнинг рельеф дизайни кўзга яққол ташланади.
Қор нусха ҳақиқий LaFerrari’га янада ўхшаш бўлиши учун жуфтлик экологик тоза бўёқдан фойдаланган. Натижада қора том ва ғилдирак дискаларига эга қизил рангли суперкар пайдо бўлган. Бундан ташқари, қор суперкари муаллифлари сариқ бўёқ ёрдамида Италия маркасининг машҳур эмблемасини ҳам ясаган.
500 нусхада ишлаб чиқарилган Ferrari LaFerrari’нинг нархи 2,2 миллион доллардан бошланади. Айни вақтда иккиламчи бозорда спорткар нархи 4 миллион долларни ташкил этмоқда.
Аввалроқ YouTube’даги 3D Sanago каналида Porsche Taycan’нинг уч ўлчамли ўйинчоқ нусхаси 3D-ручка ва оддий асбоб-анжомлар ёрдамида яратиш жараёни тасвирланган видео пайдо бўлган эди.
Изоҳ (0)