Голливуднинг таниқли актёри Сильвестр Сталлоне янги Chevrolet Corvette C8’ни қўлга киритган биринчи мижозлар қаторидан жой олди. У қадар машҳур бўлмаган мижозлар буюртма қилган спорткарларини кутаётган бир пайтда, «Рокки» ва «Рембо» ўз автомобили қаршисида суратга тушишни бошлаб юборди, деб хабар беради Motor.
Сталлоне янги Corvette’ни Мерфрисборо шаҳридаги (Теннесси штати) Chevrolet дилеридан сотиб олган. У ердан спорткар актёрнинг Флоридадаги уйига етказиб берилган, хусусан, етказиб бериш ишлари билан автосалон эгаси Бо Триветтнинг шахсан ўзи шуғулланган. У Facebook’даги саҳифасига юлдуз билан Rapid Blue рангидаги янги автомобиль фонида тушган суратини жойлаштирган ва Сталлоне энди унинг мижози эканлигини тасдиқлаган.
AutoEvolution нашрининг тахминича, Сталлоне машҳурлиги сабаб моделни биринчилардан бўлиб қўлга киритган мижозлар қаторидан ўрин олган — унга машина навбатдан ташқари етказиб берилган. Айрим маълумотларга кўра, олдиндан буюртма учун ариза берган мижозлар ҳамон ўз Corvette’ларини кутмоқда. Масалан, Жоржия штатида истиқомат қилувчи Деннис Калер 2020 йилнинг декабрида лотереяда янги Chevrolet Corvette’ни ютиб олган, бироқ ҳамон уни қабул қилиб олганича йўқ.
Corvette C8 купесининг нархи 59 995 доллардан бошланади, родстер учун эса камида 67 495 доллар тўлаш керак. Жамланмаси ва қўшимча қурилмалар билан модель нархи 100 минг долларга етади. Сталлоненинг машинаси қанчага тушгани бўйича маълумотлар йўқ.
Аввалроқ Сильвестр Сталлоне ўзининг Cadillac Escalade’сини 350 минг долларга сотаётгани тўғрисида хабар берилганди.
Изоҳ (0)