Оқ уй вакилларининг нутқларини кар ва эшитиш қобилияти заиф бўлган томошабинларга мослаштирган сурдо таржимон консерватив сиёсий гуруҳларнинг видеоларини ҳам таржима қилгани аниқлангандан сўнг қайта ишга чақирилмади. Аёл АҚШнинг собиқ президенти Дональд Трампни қўллаб-қувватлагани учун камситилган ва ишдан бўшатилган деб ҳисоблайди. Бу ҳақда The New York Post хабар берди.
ОАВда Хизер Мьюшоу Республикачилар партияси тарафдори эканлиги, Трамп президентлик кампаниясининг ташриф қоғози бўлган «Американи яна буюк қиламиз» қизил кепкада суратга тушгани ҳақида хабарлар пайдо бўлгач, ижтимоий тармоқ фойдаланувчилари уни ҳақорат қила бошлаган. Эшитиш имконияти чекланган актёр ва модель Найл ДиМарко уни ишдан четлаштиришни талаб қилиб, онлайн петиция ташкиллаштирган. Уни тўққиз мингдан ортиқ киши қўллаб-қувватлаган.
Аёлнинг ўзи эса сиёсий қарашлари унинг ишига таъсир қилмаслигини айтмоқда. «Ишимнинг асосий мақсади — маълумотни етказишдир», — деб таъкидлаган у журналистлар билан суҳбатда ва у республикачи бўладими, демократ бўладими, кимга ишлаши аҳамиятсиз эканлиги, шунчаки эшитиши чекланган одамларга ёрдам бериш ниятида эканлигини билдирган.
Изоҳ (0)