Туркманистон президенти Гурбангули Бердимуҳамедов мамлакат маданият вазири Атагелди Шамирадовга сўнгги огоҳлантириш билан ҳайфсан берди ва камчиликларни иложи борича тезроқ тузатишни талаб қилди, деб хабар берди «Интерфакс», «Нейтральний Туркменистан» нашрига таяниб.
«Халқнинг бугунги ютуқлари ва бахтли ҳаётини мадҳ этувчи янги спектакллар маданият марказлари ва театрларида намойиш этилмаяпти, бу ҳақидаги қисқа саҳна асарлари кам. Бу эса театр йўналиши даражасининг пастлиги ва яратилган асарларнинг бадиийлиги етарлича эмаслигини билдиради», – дейди Бердимуҳамедов 7 август куни бўлиб ўтган маданият ва оммавий ахборот воситалари ишларига бағишланган йиғилишда.
Бердимуҳамедов 2021 йилда нишонланадиган Туркманистон мустақиллигининг 30 йиллигини «муносиб тарзда ёритиш» бўйича топшириқ берди.
Президент Туркманистон телевидение, радиоэшиттириш ва кинематография давлат қўмитаси раиси ҳамда телевидение ва радиоканаллар раҳбарларига мурожаат қилиб, Туркманистон мустақиллигининг 30 йиллигига бағишланган дастурларни мунтазам равишда намойиш этишни буюрди.
Бундан ташқари, Бердимуҳамедов мустақилликнинг 30 йиллигига бағишланган барча оммавий тадбирларни, тантаналарни ва театрлаштирилган томошаларни «ушбу соҳадаги замонавий ютуқлардан фойдаланган ҳолда» ўтказишни буюрди. У устувор вазифалар қаторида ушбу тадбирларда «миллий урф-одатлар ва анъаналарнинг ўзига хос хусусиятлари, халқнинг маданий ва маънавий қадриятлари» акс эттирилиши кераклигини айтди.
Бундан аввал Туркманистон президенти иккинчи сунъий йўлдошни учиришни ва юк самолётларини сотиб олишни буюргани, саноат сектори ишини танқид қилиб, Туркманхимия раҳбарига қаттиқ танбеҳ бергани ҳамда олимларга картошка ҳосилдорлигини оширишни буюргани ҳақида хабар берилганди.
Изоҳ (0)