Buxoro viloyatining Qorako‘l tumanida qo‘shnisining yerto‘lasidan 6 million so‘m pulni o‘g‘irlagan 22 yoshli fuqaro qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, Qorako‘l tumani “Darg‘ali” mahalla fuqarolar yig‘inidagi Oqrabot qishlog‘ida yashovchi fuqaro N.O. tuman IIBga murojaat qilib, noma’lum shaxs tomonidan uyining yerto‘lasida jamg‘arib kelayotgan 6 million so‘m miqdoridagi pullari o‘g‘irlanganini bildirgan.
Ariza asosida tuman IIB tomonidan tezkor-surishtiruv harakatlari olib borilgan.
Qorako‘l tuman IIB EKB leytenanti Alisher Nazarovga ko‘ra, voqea joyi sinchkovlik bilan ko‘zdan kechirilib, qo‘l barmoq izlari olingan. Qo‘l barmoq izlari ashyoviy dalil sifatida viloyat IIB ekspert-kriminalistika bo‘limiga yuborilgan. Mazkur bo‘limda mavjud shaxsni avtomatlashtirilgan dektoloskopik-identifikatsion tizimi orqali tekshiruv o‘tkazilgan va o‘g‘rilik jinoyatini jabrlanuvchining qo‘shnisi bo‘lgan 22 yoshli F.B. sodir etgani aniqlangan.
“Qo‘shnimning yaxshi niyat bilan pul jamg‘arib yurganidan xabardor edim. Keyin oson yo‘l bilan unga ega chiqish rejasini tuzdim. Kechki paytda bu pulni qo‘lga kiritib, o‘z hovlimizdagi somonxonaga berkitib qo‘ydim. Qilgan ishimdan pushaymonman”,— dedi o‘g‘rilik sodir etgan F.B. “Darg‘ali”da mahalla faollari bilan o‘tkazilgan uchrashuvda.
Arizachiga tegishli bo‘lgan pullar rasmiylashtirib, qaytarib berilgan. Fuqaro F.B.ga nisbatan esa Jinoyat kodeksining 169-moddasi 2-qismi, “g” bandi (o‘g‘rilik) bilan jinoyat ishi qo‘zg‘atilgan.
Mavzuga doir:
- Sergelida 3 ta Spark’dan qiymati jami 11 mln so‘mdan ortiq bo‘lgan pul va buyumlarni o‘marganlar qo‘lga olindi
- Namangandagi masjiddan 600 ming so‘mlik qishki poyabzalni o‘g‘irlab ketgan shaxs ushlandi
- Farg‘onada otasining uyidan 1,9 ming dollar va 3 mln so‘m o‘g‘irlagan o‘g‘ilga jinoyat ishi qo‘zg‘atildi
Izoh (0)