Angliyada aerotaksi va dronlar uchun aeroport quriladi

Janubiy Koreyaning Hyundai avtomobilsozlik kompaniyasi Buyuk Britaniyada eVTOL-apparatlari uchun birinchi aeroportni quradi. Obyekt Koventri shahrida joylashadi va kelajakda yangi aerotaksilar bozoridagi loyihalar uchun test maydonchasiga aylanadi, deb xabar beradi “Korrespondent.net”.

“Kelajak aviamobillari uchun innovatsion yerusti infratuzilmasini xizmat sifatida taqdim etamiz. Boshqariluvchi va uchuvchisiz boshqariladigan transport vositalari uchun o‘ta ixcham, tez quriladigan, ko‘p funksiyali operatsion markaz samolyotlarni boshqarish, quvvatlantirish, yuklarni ortish kabi vazifalarni bajarishga xizmat qiladi”, — deyiladi Hyundai bayonotida.

Air-One ishchi nomini olgan loyiha Hyundai va Urban Air Port kompaniyalari muhandislarning hamkorligidagi ishi hisoblanadi.

“Platforma modul arxitekturasi bazasida qurilgan va aeroportning o‘zi uchun yuqori mobillik darajasiga ega — Air-One’ning konussimon konstruksiyasi uni tez o‘rnatish, boshqa joyga ko‘chirish va yana yig‘ish imkonini beradi”, — deyiladi loyiha izohida.

Loyihaga ko‘ra, turli tipdagi quvvatlantirish stansiyalari, yo‘lovchilar uchun kutish va dam olish zonalari qo‘nish konusi ostida joylashadi. Parvoz maydonchasining diametri esa 40 metr atrofida bo‘ladi va turli eVTOL-apparatlarining qo‘nishini ta’minlaydi.

Ixtirochilarning so‘zlariga ko‘ra, Air-One’ning asosiy maqsadi — barqaror havo mobilligiga qo‘yilgan cheklovlardan voz kechish va aerotaksi hamda boshqa havo transportlari uchun karbonat angidridsiz ekotizim yaratishdan iborat.

Shuningdek, Urban Air Port dengiz va osmono‘par binolar tomida qo‘nish portlarini yaratgan. Yaqin kelajakda hamkorlar butun dunyo bo‘ylab 200 dan ortiq shu turdagi obyektlarni o‘rnatish va eVTOL-apparatlariga bo‘lgan global talabga mos ravishda joylashtirishni bosqichma-bosqich tezlashtirish niyatida.

Koventridagi birinchi maydonchaning qurilish ishlari shu yilning oxiriga qadar yakunlanadi.

Avvalroq Singapurda 42 ming uyga mo‘ljallangan ekoshahar qurilishi, ilk uylar 2023-yildan foydalanishga topshirilishi kutilayotgani to‘g‘risida xabar berilgandi.