Фарғонада МИБ ходими 2 минг доллар пора билан ушланди

МИБнинг Фарғона вилояти Тошлоқ тумани бўлими давлат ижрочиси 2 минг доллар пора билан ушланди, деб хабар бермоқда «Xabar.uz».

Маълум бўлишича, у ўз хизмат мавқейидан фойдаланиб, иш юритувидаги ижро иши юзасидан гидропоника технологияси асосида иссиқхона ташкил этган фермер хўжалигининг электр энергиясидан бўлган қарздорлиги бўйича ижро ҳаракатларини тугатиб беришини айтиб, эвазига 2 минг доллар талаб қилган.

ДХХ Фарғона вилояти бошқармаси ва Бош прокуратура ҳузуридаги Департаментнинг ҳудудий бошқармаси ходимлари томонидан 22 январь куни ўтказилган тезкор тадбирда мазкур шахс сўралган пулни олган вақтида ушланган.

Шунингдек, Сирдарё вилояти Мирзаобод тумани архитектура бўлимининг собиқ ходими маҳаллий фуқарога Сирдарё тумани «Адолат» МФЙ ҳудудидан 12 сотих ер майдонини ажратиш тўғрисида туман ҳокими қарорининг чиқарилиши учун керак бўладиган ҳужжатларни расмийлаштиришда ва ушбу ер майдонида қурилиши режалаштирилаётган ёрдамчи хўжалик биносининг эскиз лойиҳаси ҳужжатларини тайёрлашда ёрдам беришини айтиб, эвазига 1200 доллар сўраган.

Аввалига у 200 доллар эквиваленти ҳисобида 2 миллион 100 минг сўм олган, кейинроқ эса 900 доллар олган вақтида ДХХ ва Департаментнинг вилоят бошқармалари ходимлари томонидан ашёвий далиллар билан ушланган.

Дастлабки суриштирув ҳаракатлари давомида у 900 долларнинг маълум бир қисмини Сирдарё туман қурилиш бўлими бошлиғига беришини айтган. Шундан сўнг тезкор тадбир давом эттирилиб, ушбу мансабдор шахс қурилиши режалаштирилаётган ёрдамчи хўжалик биносининг эскиз лойиҳаси ҳужжатларини тасдиқлаб бериш ҳамда ушбу ерга эгалик қилиш ҳуқуқи бўйича туман ҳокимининг қарори чиқарилиши учун лозим бўлган ҳужжатларни расмийлаштириб бериш эвазига 400 долларни ўз хизмат хонасида олган вақтида ушланган.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилган.

Аввалроқ Андижон вилоят ИИБнинг катта терговчиси ва вақтинча сақлаш ҳибсхонаси бошлиғи 12 минг доллар пора билан ушлангани, ер олиб беришни ваъда қилиб, пора билан қўлга тушган Марҳамат тумани ҳокимининг собиқ ёрдамчиси етти йилга озодликдан маҳрум қилингани ҳақида хабар берилган эди.