Ер олиб беришни ваъда қилиб пора билан қўлга тушган Марҳамат тумани ҳокимининг собиқ ёрдамчиси етти йилга озодликдан маҳрум қилинди

Пора олиш ва беришда иштирок этган Марҳамат тумани ҳокимининг собиқ ёрдамчиси ҳамда унинг шериклари озодликдан маҳрум этилди. Бу ҳақда Ўзбекистон Олий суди матбуот хизмати «Дарё»га маълум қилди.

Эслатиб ўтамиз, Ўзбекистон Президенти ҳузурида 15 октябрь куни ўтказилган йиғилишда Андижон вилояти Марҳамат тумани ҳокими ёрдамчиси У.А. сентябрь ойида яқин алоқалари орқали Марҳамат тумани ҳудудидан 11 гектар ер майдони ажратиш учун жами 29 минг доллар миқдоридаги ноқонуний пулни олаётган вақтда жиноят устида ушлангани айтиб ўтилган эди.  Андижон вилояти прокуратураси Марҳамат тумани ҳокими ёрдамчисининг 29 минг доллар пора олиш ҳолати уч қисмдан иборат эканлигини маълум қилганди.

Ишни кўриб чиққан жиноят ишлари бўйича Андижон туман суди Марҳамат тумани ҳокимининг собиқ ёрдамчиси У.А. Жиноят кодексининг 25 (жиноятга тайёргарлик кўриш ва жиноят содир этишга суиқасд қилиш), 168-моддаси (фирибгарлик) 4-қисмининг «а» (жуда кўп миқдорда) банди ва 28,211-моддаси (пора бериш) 3-қисмининг «а» (жуда кўп миқдорда) бандида назарда тутилган жиноятларни содир этганликда айбли деб топилган. Унга тайинланган жазолар қисман қўшилиб, узил кесил 2 йил муддатга давлат органларида ишлаш ҳуқуқидан маҳрум қилиниб, 7 йил 3 ой озодликдан маҳрум қилиш жазоси тайинлаган.

Пора бериш ва олишда иштирок этган фуқаро М.А. 5 йилга, фуқаро Т.З. 6 йил-у 1 ойга, фуқаро Ю.И.га эса 4 йил озодликдан маҳрум қилиш жазоси тайинланган. Фуқаро Н.Х.га тайинланган жазолар қисман қўшилиб, узил-кесил базавий ҳисоблаш миқдорининг 51 баравари миқдорида (11 миллион 373 минг сўм) жарима жазоси тайинланган.

Маълумот учун, Президент раислигида ўтказилган йиғилишда Тошкент шаҳар ҳокимлиги қошидаги капитал қурилиш бош бошқармаси бошлиғи ўринбосари, Чилонзор туманидаги инвестициялар ва ташқи савдо бўлими бошлиғи, Қибрай, Чилонзор, Бувайда, Оққўрғон, Бўстонлиқ тумани ҳокимининг ўринбосари ер майдонини сотаётган вақтида жиноят устида қўлга олингани айтиб ўтилган.