Фарғона вилоятининг Сўх туманида аэродром қурилиши бошланди. Ишларни 2021 йилнинг майига қадар якунлаш режалаштирилган, деб хабар беради «Фарғона халқаро аэропорти» МЧЖ матбуот хизмати.
«Мазкур аэродром қурилиши учун туманнинг «Новобод» МФЙ ҳудудидан жаъми 4,5 гектар ер майдони ажратилган бўлиб, учиш ва қўниш майдончасининг узунлиги 650 метр ва эни 100 метрни ташкил этади. Лойиҳа қиймати 12 миллиард сўмдан иборат. Қурилиш ишларини май ойига қадар якунига етказиш режалаштирилган», — дейилади хабарда.
Маълумот учун, Ўзбекистон Президентининг «Сўх туманини 2020–2021 йилларда ижтимоий-иқтисодий жиҳатдан ривожлантириш чора-тадбирлари тўғрисида»ги қарорида Сўх туманида аэродром қуриш вазифаси топширилган эди. Парвозлар учун «Ан» самолётлари ва «Ми-8» вертолётларидан фойдаланиш режалаштирилган.
Эслатиб ўтамиз, Ўзбекистон—Қирғизистон чегарасида жойлашган Чашма булоғи олдида 2020 йил 31 май куни икки мамлакат фуқаролари ўртасида зиддият келиб чиққан. Ўзбекистон бош вазири Абдулла Арипов 1 июнь куни воқеа юз берган жойга ташриф буюрди ва аҳоли билан учрашди. Шунингдек, Абдулла Арипов Қирғизистон расмийлари билан учрашиб, ҳодиса юзасидан музокара олиб борди. Шу куни Ўзбекистон ва Қирғизистон президентлари мазкур ҳодисани телефон орқали муҳокама қилди. Ўзбекистон ҳукумати аъзолари ҳудуддаги муаммоларни ўрганиш учун 2 июнь куни у ерга ташриф буюрди.
Можаро оқибатида 187 нафар ўзбекистонлик касалхонага ётқизилган, Ўзбекистон томонда учта хонадон ёниб кетган. Қирғизистоннинг Боткен вилоятида эса уй ва омборхона ёниб кетган, шунингдек, 25 киши жароҳат олган. Бундан ташқари, бош вазир Абдулла Арипов билан бўлиб ўтган учрашувда сўхликлар вилоят ҳокими Шуҳрат Ғаниевдан норози эканлигини ҳам билдирганди.
Изоҳ (0)