«Рақамли инфратузилмани ривожлантириш учун 2,5 млрд доллар жалб қилинади» — Абдулла Арипов
Яқин икки йил ичида Ўзбекистонда рақамли инфратузилмани ривожлантириш учун 2,5 миллиард доллар жалб этилади. Бу ҳақда бош вазир Абдулла Арипов 5 февраль куни Олмаотада бўлиб ўтган форумдаги чиқишида маълум қилди, деб хабар бермоқда «Gazeta.uz»
Унинг сўзларига кўра, ушбу маблағлар ҳисобига Тошкентда, Бухорода ва Қўқонда учта янги дата-марказлар ишга туширилиши, телекоммуникацияларнинг фиксация қилинган тармоқларини кенгайтириш ва мобил алоқаларни модернизация қилиш, электрон ҳукуматни ривожлантириш ва IT соҳасида кадрларни тайёрлаш ишлари амалга оширилиши кўзда тутилган.
Ҳукумат раҳбари ўз чиқишида барча болалар боғчаларида, тиббиёт муассасаларида ва 8000 дан ортиқ мактабларда юқори тезликдаги интернет таъминланганини маълум қилди. «Бу йил биз қолган мактабларни улашни якунлаш, шунингдек, барча — бутун мамлакат бўйича 10 мингга яқин маҳалла фуқаролар йиғинларини интернет билан таъминлашни режалаштиряпмиз», — дея қўшимча қилган у.
Абдулла Арипов жорий йилда соғлиқни сақлаш ва қишлоқ хўжалиги соҳаларида ҳам рақамлаштиришни кенгайтириш ҳамда банк соҳасидаги трансформацияни давом эттириш режалаштирилганини таъкидлади.
Рақамли тадбиркорликни ривожлантириш ҳам устувор вазифалар қаторида, дея давом эттирган бош вазир. У мамлакатда рақамли хизматларга талаб сезиларли даражада ошганини, электрон тўлов тизимлари фойдаланувчилари сони эса 14 миллион кишидан ошганини қайд этди.
Рақамли форумда Евросиё иқтисодий иттифоқи аъзо ва кузатувчи мамлакатлари ҳукумати раҳбарлари қатнашган. Шу куни Олмаотада Ўзбекистон делегацияси илк бор иштирок этаётган Евросиё ҳукуматлараро кенгашининг йиғилиши ҳам бўлиб ўтади.
Форум олдидан Абдулла Арипов Россия бош вазири Михаил Мишустин, Қирғизистон бош вазири Улуғбек Марипов билан учрашди.
